KHAWTHLIR

Thisen pe
Leisenzo Branch YMA chuan nimin khan an khaw community hall-ah thisen pek rûnpui an huaihawt a, YMA member mipa 36 leh hmeichhia palite'n Champhai District Hospital tan thisen unit 40 an pe. Serchhip Higher Secondary School NSS pawhin nimin khan Serchhip District Hospital-ah thisen unit 25 an pe a, petute mipa 13 leh hmeichhia 12 an ni.

Mipa ruang chhar
Nimin zing dar 6 vel khan Chaltlang Salem Vengah Michael Lalhlimpuia (17), Mamit district-a Pûkzíng khua, Chaltlanga khawsa mek ruang chhar a ni. Bawngkawn Police Station leh Chaltlang YMA secretary Vanlalhluna hnen aṭanga thu dawn danin, ruang hi Bawngkawn police-te leh Forensic lam mite'n buaipui zuiin, Civil Hospital, Aizawlah postmortem a ni a, chumi hnuah an khua Pukzing panpui a ni.

Tui pipe enfiah
Aizawl West-III bialtu MLA VL Zaithanzama chuan May 1, Pathianni khan a bial chhung, Khatla Chawnga Road-ah Tlawng lui aṭanga Aizawla tui lâk chhohna pipe inzawmna chiang tâwk lo chu PHE engineer-te nen an enfiah. MLA chuan, Tlawng aṭanga tui lâk a ngaih pawimawh thu leh, hnianghnâr leh thianghlim zawka tui mamawh an neih theih nan tui lâkna pipe leh khawlte uluk taka enkawl a pawimawh thu a sawi.

BIS training
Bureau of Indian Standard (BIS) chuan nimin khan Khawzawl district-a sorkar hnathawkte tan BIS training an buatsaih a, Khawzawl bawrhsap CC Lalchhuangkima'n video conference kaltlangin a hawng.

Duty-na tur pawt
Nimin khan Siaha DC conference hall-ah MADC-a MDC inthlanpuia duty tur presiding officer leh first polling officer mi 106 ve vete chu an duty-na hmun tur pawhna (randomisation) buatsaih a ni. Polling station 81-a duty turte bakah, thlavéng (reserve)-a awm tur mi 25 ve ve pawh nghal a ni.