Tourism hmasawn dan tur sawiho

Planning & Programme Implementation department leh Tourism department chuan nimin khan sorkar laipuia Ministry of Development of North Eastern Region (DoNER) leh North Eastern Council (NEC)-te nen ṭanghoin Aijal Club-ah round table discussion an buatsaih a, Tourism minister Robert Romawia Royte-in a hmanpui.

Tourism Minister chuan, Tourism department-in tourism hmasawn nan nasa takin hna a thawk tih sawiin, "Covid-19 lèn vanglai pawhin chàwl loin hna an thawk a, India rama a hmasa ber ni turin Responsible Tourism Policy 2020 bakah, a kaihhnawih inkaihhruaina leh dan leh hraite an duang a ni," a ti.

Tourism-in a huap zau tih sawiin Minister chuan, "Mizoram chuan sport leh adventure tourism lamah hmabak êng tak a nei a, sport tourism hi Mizoram tan tih tak zeta tuipui tham a ni. Adventure tourism lamah pawh kawng inhawng zau zelin, state dangte neih ve loh motosport racing track, Lengpui bulah siam tum a ni a, rural electrification corporation (REC) aṭangin a siamna tur sum cheng vbc 7.5 hmuh a ni," a ti a; tourism chu Mizoram leh India thlun zawmtu pawimawh a tlin thu a sawi.

Tourism Minister hian Tourism department website thar mizoramtourism.com bakah, ios leh android application thar a tlangzarh nghal a ni.

Chief secretary Dr Renu Sharma pawhin thu sawiin, Tourism department-in khualzin hîp thei tura hma a lak dante a tarlang a; environment humhalh chunga zin mite'n an tlawh theih tur khuanu duan sa hmun mawi leh ennawm tak tak Mizorama awmte chu eco-tourism tihlâr nan thil ṭangkai tak a nih tur thu te, uar leh zuala eco-tourism chawi lâr a ṭul thute a sawi.

Azadi ka Amrit Mahotsav NEC nodal officer R Lalrodingi tarlan danin, kum 17 chhungin NEC-in Mizoram tan project 160 a sanction a, chu'ng atan chuan cheng vbc. 1,378.99 pek chhuah a ni.