Lunglei Jail-ah mi 130 an táng mek

Lunglei bawrhsap Kulothungan A chuan nimin khan Sazaikawna Lunglei District Jail a tlawh. District Jail thawktute chuan, jail-ah hian mipa 115 leh hmeichhia 15, an vaiin mi 130 an awm mek thu leh an chêp thu an lo hrilh.

Lunglei District Jail-ah hian Lunglei DC chuan thawktute leh jail-a tángte a kâwm a, jail dinhmun leh an mamawhte zir chiang tura tlawh a nih thu a sawi.

Kulothungan A chuan, jail chu nun siamṭhatna hmunah hman tum tura tángte chahin, "In chhuah hunah pawh khua leh tui ṭha, ram leh khawtlang tana mi ṭangkai ni turin inpuahchah ula, in thiamthil zirna tur ruahman hi ka ngai pawimawh tak zet a ni," a ti a, an mamawhte inthlahrung loa a hnena thlen ṭhin turin a chah.

District Jail-a thawkte leh tángte'n mamawh an lo thlente chu Bawrhsap chuan CSR leh department hrang hrang nen ṭangkawpin tihhlawhtlin a tum thu a sawi a; mamawh an thlen zinga a thlawna inentirna (free health camp) buatsaihsak chu tihhlawhtlin thuai a nih tur thu a sawi bawk.

Lunglei District Jail hi September 19, 1977-ah hawn a ni. Mipa 103 leh hmeichhia 10, an vaiin mi 113 tàn theihna tura tih a ni a; mipa 115 leh hmeichhia 15, an vaiin mi 130 an táng mek thung. Thawktu mi 38 an awm mek bawk. Jail-a thawkte chuan, jail chu a chêp thu an sawi.