KHAWTHLIR

Governor PS Sreedharan Pillai chuan nimin khan Covid-19 dona atan Chief Minister's Relief Fund-ah June thlaa a hlawh (basic pay aṭanga 30%) Rs. 1,05,000 a thawh.

Aizawl Civil Hospital (ACH) medical superintendent Dr Lalhmu­chhuaka chuan nimin khan ngenna leh hriattirna a tichhuak a, ACH chu Covid-19 inkai darh theihna hmun hlauhawm a nih thu tarlangin, "OPD-ah social distan­cing mumal taka kalpui a nih theih nan damlo ni tina en theih zat bithliah a ni dawn a, hei hi mipui leh thawktute himna atana tih a ni," a ti a, mipui hriatthiamna a ngen.

Nimin aṭang khan Vairengte screening point-ah tank lorry driver leh handyman-te Covid-19 an kai leh kai loh RT-PCR hmanga endik turin swab sample laksak ṭan a ni. Nimin khan mi 20 sample lak a ni a, chawlhkar tin sample lâk ṭhin a ni ang.

H Lalhluntluangi d/o H Beimotha, Meisavaih, Sia­ha district chu Covid-19 donaa a ṭul anga damdawi lama thawkte hlawh nei loa pui turin Siaha District Hospital-ah a inpe. Amah hi Diploma in Radio Imaging and Technology zir zo tawh a ni.

Lunglei Civil Hospital laboratory-a TrueNET khawl hmangin July 8, Nilaini khan mi 20 swab sample endik a ni a, Covid-19 vei hmuh chhuah an awm lo. 

Home leh DMR secretary Lalbiaksangi chuan nimin khan Lungleiah District Emergency Ope­ration Centre (DEOC) leh district jail a tlawh. Lalbiaksangi hi Lunglei DC V Lalsangliana hoin DC conference hall-ah an lo dawngsawng a, hmalakna tur hrang hrangte an sawiho a ni.

K Sang Chhum lehkhabu ziah ‘FLAM’ (Former Legislators Association of Mizoram) tih chu nimin khan deputy speaker Lalrinawma’n a pisaah a tlangzarh. FLAM hi kum 1994-ah din a ni a, K Sang Chhum hi general secretary hmasa ber a ni. FLAM-ah hian member 151 an awm mek a ni.

Republic Veng chhung kawn hrang hranga CCTV dah thar chu nimin zing khan bialtu MLA C Lalsawivunga'n a hawng a; heng CCTV-te hi MLA-in a pek an ni.