Party sorkar ni lo, mipui sorkar din hi ZPM thil tum ber pakhat a ni - Lalliansawta

ZPM leader Lalliansawta chuan nimin khan an party pisaa mi thar lawm luhna inkhawmah thu sawiin, party sorkar ni lo, mipui sorkar din chu ZPM thil tum ber pakhat a nih thu a sawi.

Lalliansawta chuan, ZPM-in mipui sorkar din an tum thu sawiin, "Party sorkar ni lo, mipui sorkar din hi ZPM thil tum ber pakhat a ni. Kan ramah party sorkar hlir kan la hrawn a, ZPM chuan mipui sorkar kan siam dawn. ZPM sorkar hunah chuan fatute'n mipui eitir hmasain a tui ṭha ṭha mipui hluîah kan chhawp dawn a ni," a ti.

Tun hnaiah ZPM-in hma an sawn nasa nia sawiin Lalliansawta chuan, "Pathian leh mipui zarah kum 2023-a sorkarna chan ngei tumin Mizoram hmun hrang hrangah hma kan la nasa a, party pawh kan insingsa nasa. Hmun hrang hrangah ZPM-in hma kan sawn nasa hle a ni," a ti a; MADC inthlan awm turah pawh ZPM-in hma an sawn hle niin a sawi.

ZPM President chuan, mipui tan an party-in an theih dan ang angin hma an la tih sawiin, "Thil zawng zawng erawh kan ûm zui hman bik rih lo," a ti a; hun rei tak hman theih loha awm tawh Civil Hospital Aizawl-a CT scan chu tun hnaiah vawi thum a hmunah an enfiah tawh tih sawiin, "Thla ruk chhunga bun fel theih a ni lo hi a mak ngawt mai. Kan en zui zel dawn a, sorkar hian hetiang zela mipui min ngaihthah chuan kan thiam dan angin hma kan la ve dawn a ni," a ti.

NABARD aṭanga sum pûk hmanga sikul thawm ṭhat chungchang sawiin Lalliansawta chuan, "Khaw hrang hranga sikul thawm ṭhatah report kan dawng nasa a, kan hruaitute'n an zir chiang mek," a ti a; hna thawh zawh hmain Mizoram sorkarin contractor-te hnenah pawisa a pe niin an hriat thu leh chutiang tur chuan chung lam aṭangin na taka nawrtu an awm nia a lan thu a sawi bawk.

ZPM consultant Haukhum Hauzel pawhin thu sawiin, democracy ramah mipui an pawimawh tih a sawi a, "Kan aiawha kan thlan roreltute aṭangin mawhphurtu nihna kan ngiat thei a, kan ngiat bawk tur a ni. Ram sum hi mipui ta a ni a, kan sum dinhmun - kan hmuhna leh hmannate hi khua leh tui kan nih avangin lo hriat ve hi kan chanvo a ni," a ti.

ZPM thuchhuah chuan, nimina inkhawmah hian ZPM zawm thar mi 95 an lawm lut niin a tarlang.