BJP hi sakhaw tih bik nei lo a ni - Minority Affairs Minister

MADC inthlan inbuatsaihnaa campaign tura rawn zin, sorkar laipuia Minority Affairs minister John Barla chu May 1, Pathianni khan Siaha College Veng ECM Kohhranah a inkhawm bakah, kohhran leh khawtlang hruaitute a kâwm a; BJP chu sakhaw tih bik nei lo party a nih thu a sawi.

Kohhran leh NGO hruaitute nen MADC CEM ina an inkâwmnaah John Barla chuan, "BJP hi sakhaw tih bik nei lo party kan ni. Prime minister Narendra Modi sorkarah Kristiante'n duhsakna nasa tak kan chang a, kei ngei pawh Kristian minister dinhmun pawimawh takah min dah a ni," a ti a; Kristian a nih avangin Mizoramah a tlángnèl thu a sawi.

John Barla chuan, Mizoram mipui mamawh dawngsawng tura a inpeih reng thu sawiin, mamawh an neihte chu a hnena thlen turin a chah a, "State sorkar hnenah in mamawh ang pek ka duh thu ka sawi ang a, an lo ti khawtlaiin an lo hnâwl thiang tawh lo ang," a ti a; kohhran leh pawl hruaituten an mamawh an thlente chu Delhi aṭangin a bawhzui tur thu a sawi.

Minority Affairs Minister hi Assam MP Kamakhya Prasad leh BJP, State Pradesh president Vanlalhmuaka ten an ṭawiawm a ni.