Hripui vei enkawl lai mi 412 chiah an awm

May 1, Pathianni khan Mizoramah Covid-19 vei mi 40 hmuh chhuah a ni. Nimin khan hripui vei dam tawh mi 255 chhuahtir an ni a, Covid-19 vei mi pakhat a thi. Nimin tlai khan hripui vei enkawl lai mi 412 chiah an awm tawh.

Pathiannia hripui vei hmuh chhuahte chu mipa leh hmeichhia 20 ve ve an ni a; RAT hmanga hmuh vek niin, hmanraw dang hmangin swab sample endik a ni lo. Positivity rate chu 15.46% a ni.

May 1-a Covid-19 positive hmuh mi 40 zinga 32 (80%) chu Saitual district-a mite an ni a, district khawpuiah mi panga hmuh niin, a bak zawng chu district khawpui páwn lama mite an ni. Saitual district-a Khawlian khuaah mi 19 hmuh niin, hmuh zawng zawng aṭangin 47.50% a tling a, Pàwlráng khuaah mi pakua hmuh a ni bawk.

IDSP record angin, Mizoramah Covid-19 vei 2,27,493 hmuh chhuah a ni tawh a, mipa 1,05,935 leh hmeichhia 1,21,558 an ni a, mipa aiin hmeichhia 15,623-in an tam zawk. Nimin tlai dar 5 thleng khan mi 2,26,384 (99.51%) chhuahtir an ni tawh a, mi 697 (0.31%) thi tawhin, enkawl mek mi 412 (0.18%) an awm.

Nimin tlai dinhmun angin, Mizorama district zawng zawngah Covid-19 positive inenkawl lai mi 100 awm tlinna a awm rih lo a; Lawngtlai district-ah positive an awm tawh rih lo a, Siaha leh Kolasib district-ah mi pakhat ve ve an awm bawk.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,493 chu mi 1,000 zelah hripui vei mi 207 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.