Thei leh thlaia Mizoram pui turin FAO sáwm

Horticulture Development Board vice chairman Prof. F Lalnunmawia, MLA chuan January 8, 2020 khan Bangkok, Thailand-a Food and Agriculture Organization (FAO) Regional Office for Asia and Pacific a tlawh a; Mizoramah thei leh thlai thar chhuah tihpun, sâwngbàwl leh hralhna lamah awmze nei zawka hmalak a nih theih nan pui a, technical support pe turin a sáwm.

FAO official-te nen an inkawmnaah Prof. F Lalnunmawia chuan, Mizoram sorkar flagship programme SEDP tihlawhtling turin sorkarin theihtawp a chhuah thu a sawi a, "Mizoramah kut hnathawktute thei leh thlai thar chhuah tihpun, sawngbawl leh hralhna kawngah awmze nei zawka hmalak a nih theih nan FAO-in technical support a pek Mizoram sorkarin kan mamawh a ni," a ti.

Sorkar thuchhuah tarlan danin, FAO hotute chuan Mizoram aṭanga sàwmna an dawng chu lawmawm an tih thu an sawi a; India sorkara Ministry of Agriculture leh FAO India kaltlangin Mizoram mamawh angte concept paper thehlut turin Prof. F Lalnunmawia an hrilh a, hun remchang hmasaah thawhho theih dan tur sawiho leh ni se, an ti.Horticulture Development Board Vice Chairman hi Mizoram Youth Commission (MYC) chairman Dr Vanlalṭanpuia, MYC member Dr C Lalsangzuala leh Planning deputy secretary Dr Lalrinchhana ten an ṭawiawm a ni.