Ration card leh Aadhaar thlun zawm tihfel hun tur FCSCA-in a pawtsei

'One Nation, One Ration Card' (National Portability) kalpui tumnaa ration card leh Aadhaar thlun zawm vekna tura tihfel theih hun chu September 30, 2020 thleng pawhsei a ni.

Food, Civil Supplies & Consumer Affairs (FCSCA) director Dr Lalhriatzuali Ralte chuan July 8, 2020 khan hriattirna a chhuah a; ration card leh Aadhaar thlun zawmna atana hun tiam pawhsei - September 30, 2020 thleng tih chu Covid-19 hripui lêng din­hmun azirin la pawhsei leh theih a nih thu a tarlang.

FCSCA Director hriattirna chuan, hun pawhsei ni mah se, tuna hmalakna kal mek tawhah chuan document thehluh turte chu a pangngaia kalpui chhunzawm tur a nih thu leh, hri léng laka mipui himna tur ngaihtuah chungin, Covid-19 vanga sor­kar­in inkaihhruaina Standard Ope­rating Procedure (SOP) bawh­chhe lo tura ruahmanna ṭha tak siam a nih tur thu a tarlang a ni.

Hriattirna chuan, "Central sorkarin 'One Nation, One Ration Card' a kalpui mek tihhlawhtlinna tur atan Aadhaar leh ration card thlun zawm ngei a ngaih si avangin tun dinhmunah chuan NFSA (National Food Security Act) beneficiary - AAY leh PHH (ration card eng leh hring nei)-te hi tih hmasak leh ngaih pawimawh tur an ni," a ti.

'One Nation, One Ration Card' tihhlawhtlin a nih theih nan NFSA beneficiary ni lo, ration card vár neite pawh intra-state portability (Mizoram chhung bika inthlun zawmna) hman a la ngaih tho dawn avangin, Aa­dhaar leh ration card thlun zawm ngei a ngai tho dawn a; mahse, hri léng avangin hmanhmawh theih a nih lo a, a hun tur chu la inhriattir leh tur a nih thu tarlan a ni bawk.

Hemi rual hian FCSCA Director chuan DCSO-te chu an district chhungah ruahmanna fel tak duang lâwk turin a chah a, "Mipui tichiai lo zawng leh harsatna thlen lo thei tur ang ber leh Covid-19 laka mipui himna ngaihtuah chungin ruahmanna felfai tak siam tur leh hma la turin ngen leh hriattir i ni," a ti.

One Nation, One Ration Card hnuaiah hian ration card-a hming chuang zawng zawngte Aadhaar card xerox copy, ration card holder bank account xerox copy, card holder passport photo copy, gas connection number lanna xerox copy leh card holder phone number-te thehluh vek tur a ni. Sorkar thuchhuak hmasaah chuan, document ṭul zawng zawng chu July 10, 2020 (Zirtawpni) thleng mahni awmna retailer-ah thehlut tura tih a ni.