DMR team-in lìrnghîng tuarte tlawh

Disaster Management & Rehabilitation (DMR) Minister hoa thurèl bawhzuiin, Champhai district-a lìrnghîng thlen ṭhinna leh chhiatna thlengte enfiah tur leh thil pawimawhte mipui zirtir turin joint director Lalrinawma Traite kaihhruai DMR team chuan nimin khan khaw hrang hrang an tlawh kual ṭan.

Lalrinawma Traite chuan, tun hnaia lirnghing ṭum eng emaw zat thleng vanga chhiatna tuarte an tawrhpui thu sawiin, "In harsatnate hriain sorkar leh district thuneitute'n theihtawp chhuahin hma an la mek zel. Dungtlang khuaah SDRF (State Disaster Response Force) team dah a ni a, mipui thlabárte hnêm turin clinical psychologist-te an che chhuak mek bawk," a ti a; chanchinbu leh cable TV kaltlanga mithiamte thil sawi­te ngai pawimawh turin mipui a chah.

Champhai SDO (Sadar) Lalnunfela chuan, DMR team chu lìrnghîng vanga harsatna thlengte endik a, mipui zirtirna pe tura an district-a kal an nih thu a sawi a, "Mipui koh khawm rem chiah lo mah se, pawl hrang hrang aiawhte'n mi dang zirtir chhâwng thei tura mithiamte thu­sawi in ngaihthlak uluk a pawimawh," a ti. DMR team hian chhiatna tuar khuate chu emergency kit, silpauline, torchlight, pamphlet leh hmanraw dangte an sem a ni.