Sarâng/plastic micron 120 aia pan Mizoramah hman phal a nih tawh lo

India Independence Day vawi 75-na pualin Aizawl DC pisa leh Central YMA chuan nimin khan Vanapa Hall kawtah vawi khat chauh hman chi sarâng chungchang inzirtirna an buatsaih. Sarâng micron 120 aia pan hman phal a nih tawh loh thu tarlan a ni.

Inzirtirnaah hian Aizawla YMA branch 14 - Tuikual South, Tuikual North, Dawrpui, Venghlui, Saron Veng, Dawrpui Vengthar, Dinthar, Khatla, Khatla South, New Capital, Tuikhuahtlang, Chhinga Veng, Electric Veng leh Zarkawt branch aṭangin mi 20 ṭheuh an tel a; hman khat daih sarâng hmang lo tura intiamna leh mi dangte zirtir tura intiamna thuziak (placard) an keng.

Bawrhsap Dr Lalhriatzuali Ralte chuan, ram leilung leh hnam humhalh kawngah mi tinin mawhphurhna an nei tih sawiin, "Kan ram leilung tichhe thei, hman khat daih sarâng donaah sorkar leh YMA-te'n hma an lakna hi hlawhtling tur chuan bul ṭan phawt a ngai," a ti.

Mihring hrisel nan boruak thianghlim leh environment ṭha a pawimawh thu sawiin Bawrhsap chuan, "Rilru leh taksa hrisel hi ram hmasawn nan a pawimawh tak zet a, hemi kawngah hian mi tinin faina ngainá a, inthlahdah lo leh dâwngdah loa khawtlang leh ram tana ṭan kan lak zel a ngai," a ti a; faina chungchangah ṭawih thei lo plastic/sarâng then fai hnatlang veng tina nei turin YMA branch-te a ngen.

Aizawl DC chuan, Rural Development leh Environment, Forest & Climate Change department-te chu plastic free office-ah puan a nih thu leh department leh pisa dangte pawh plastic free office-ah puan a nih zel a beisei thu a sawi bawk.

Mizoram Pollution Control Board member secretary Lalduhawma tarlan danin, sarâng micron 120 aia pan hman phal a nih tawh lo. Sarâng thlâkna turin puan (cotton) hman uar a pawimawh thu te, sarâng thlakna tur ngaihtuah kawngah rilru séng thiam entrepreneur tam tak an awm thu leh, sorkarin dan a siam zawm chu khua leh tui ṭha nihna a nih thute a sawi.