MADC inthlana duty turte vailiam

Mara Autonomous Dis­trict Council-a member of district council inthlanpui naktuka neih tura polling official, hmun hla zuala duty turte chu returning officer Lalsangliana, district election officer ni bawk chuan nimin khan DC pisa tual aṭangin a vailiam.

Lalsangliana chuan, democracy ramah chuan inthlanna chu white war an tih hial khawpa ngaih pawimawh a ni thu sawiin, "In mawhphurhna sànzia hre reng chung leh sorkarin a rin ngam a thlante in nih ang ngeiin, rin ngam leh rintlaka in duty hlen turin ka ngen che u. Training laia tih tur leh tih loh tur kan inzirtirte hre rengin tluang taka in duty in hlen a, him dam taka in lo lêt leh vek theih nan duhsakna sang ber ka hlan a che u," a ti.

Nimina vailiam tak polling party-te hi hmun hla zuala polling station 12-a duty turte an ni a; polling station dang 69-a duty tur polling official-te chuan vawiin zing dar 6-ah an duty-na hmun an pan ve leh dawn a ni.

MADC inthlanpui hi naktukah neih a ni dawn a, zing dar 7 aṭanga tlai dar 5 thleng vote thlak hun hawn a ni ang.