Tourism-in Freedom Trek an buatsaih

Tourism department chuan India zalenna kum 75-na lawmna, Azadi ka Amrit Mahotsav (AKAM) pualin nimin khan Ailawng leh Reiek tlang inkarah Freedom Trek an buatsaih a, chief secretary Dr Renu Sharma-i'n Ailawnga Khuangchera Hall kawt aṭangin a vailiam.

Chief Secretary chuan, Freedom Trek chu India ramin zalenna a hmuh theihna tura mahni inphat leh nunna chàn huama pên chhuak pasalṭhate hriatrengna, chawimawina leh faina kawnga inzirtirna pawimawh tak a nih thu a sawi.

Dr Renu Sharma chuan, ṭhangthar la awm turte tana chênna tlak khawvel hnutchhiah a ṭul thu sawiin, "Kan thlahtute kha ramngaw leh nungchate nen inzah tawn takin an chengho ṭhin a, an thlahte hian kha khá kan tidal telh telh a, a nghawng pawh nasa takin kan tuar mek. Chuvangin, Pathianin thil siamte inrem leh inngeih taka cheng za tura min tih kha kan chawi nun a ngai," a ti.

Mizorama khualzinte hîp kawngah ṭan lâk a ṭul thu sawiin Renu Sharma chuan, "Faina leh thianghlimna, sik leh sa tichereu lo zawnga kal hi kan zawrh a ngai," a ti a; faina beihpui thlakna, Swachh Bharat Campaign - cum - Responsible Tourism tih chu thupuia neih a ṭul thu a sawi.

Freedom Trek hi Ailawng aṭanga ṭanin Reiek tlang chhip thleng an kal a, tlang aṭangin Reiek Tourist Resort an pan leh a, an kal thui zawng chu km. 5.5 a ni. Ṭhalai 300 chuang an tel a, a tam ber chu college leh higher secondary school zirlaite an ni a; kum 92 mi Lalsanga, Bethlehem Veng a tel bawk.

Trek-a telte hnenah faina kawnga inzirtirna atan paper bag pek a ni a, kalkawnga bawlhhlawhte an tifai nghal bawk.