2021 chhungin TB vei 1,749 hmuh a ni ; Kuminah 465 hmuh chhuah a ni tawh

Mizoramah kum 2021 chhung khan tuberculosis (TB) vei mi 1,749 hmuh chhuah a ni a, TB vangin mi 72 an thi. Kumin 2022-ah January-March thla chhungin ngawr (TB) vei mi 465 hmuh chhuah a ni tawh.

April 2, Thawhṭannia Secretariat conference hall-a State TB Forum Meeting vawi thumnaa tarlan danin, kum 2021 chhung khan Mizoramah TB vei rinhlelh mi 4,084 endik niin, chung zinga mi 1,749 chuan TB an vei tih hmuh chhuah a ni a, mi 4,084 zinga mi 114 chu MDR-TB vei an nih bakah, TB leh HIV vei kawp mi 289 hmuh an ni.

Kum 2021 chhungin TB vei zinga 90% chu dam takin an awm zui a, mi 72 erawh chu an thi thung. Kumin 2022-ah January aṭanga March thla thlengin TB vei mi 465 hmuh chhuah a ni tawh bawk.

Health secretary R Lalramnghaka, State TB Forum chairman ni bawk kaihhruai State TB Forum Meeting-ah hian kum 2021 chhunga TB programme hmalakna te, TB vei hmuh chhuah dan te, TB vei damlote'n District TB Centre, Falkawn an panna lama an senso leh damlote veivahna zângkhai zawka phuhrûk theih dan tur te, Aizawl aṭanga District TB Centre, Falkawna bus service awm theih dan turte leh, Aizawla District TB Centre sawn hnaih chungchangte sawiho a ni.

District TB Centre tina x-ray khawl la bun fel lohte a rang lama tihfel theih dan tur te, TB laboratory thar CDST Laboratory, Falkawn chu a taka hman theih a nih hun tur te, Covid-19 a ziaawm chhoh avanga Covid swab test-na atana hman TrueNAT khawlte chu TB endikna atan National TB Elimination Programme hnuaiah hman a nih theih nana hmalak dan turte sawiho a ni bawk.