KHAWTHLIR

SEDP committee
Aizawl District SEDP Committee chu May 2, Thawhṭanni khan Aizawl SP conference hall-ah an chairman Dr Lalhriatzuali Ralte, district bawrhsap hoin an ṭhu a, Village Level SEDP Committee din turin a rang thei ang bera survey neih a, committee din an rêl. Village SEDP committee din a nih theih nan khua leh veng tina village council leh local council-te ṭha taka thawhpui turin an sáwm a ni.

Minister-in hawng
Minister Dr R Lalthangliana chuan nimin khan a bial, South Tuipui chhunga Hnahthial HDFA Ground-ah Voltas Malsawm House - MFA Inter District Junior Boys Football Championship a hawng. Minister hian championship senso phuhrûk nan Rs 1,00,000, goal lèn pahnih leh football pathum a pe a ni.

BestSound Centre
Beng ṭha lote hman tur kháwl siamtu lian SIGNIA chuan nimin khan India hmarchhaka BestSound Centre hmasa ber, EL Nathan Hearing Clinic chu Bawngkawnah an hawng. EL Nathan Hearing Clinic hi M.Sc (Audiology) and speech language pathologist Lalbiakzuali Fenate din a ni a; May 4-14, 2022 chhungin a thlâwna beng entirna, 'Hearing Test and Trial Free Clinic' an buatsaih dawn a, a duh apiang tan pan theih a ni.

Lehkhabu tlangzarh
Prof. Sangkima lehkhabu ziah, 'History of the Roman Catholic Church in Mizoram 1925-2020' tih chu nimin khan Synod Conference Hall-ah Aizawl bishop Most Rev. Stephen Rotluanga'n a tlangzarh. Lehkhabu hi English-a ziah a ni a; Mizorama Roman Catholic chanchin bakah, Presbyterian Kohhran, Baptist Kohhran, Salvation Army, UPC leh Evangelical Church of Maraland chanchinte tarlan tel a ni.

Mi 8,48,825-in Vaccine la tawh
Mizoramah May 2, Thawhṭanni thlengin mi 8,48,825 hnenah Covid-19 vaccine dose 15,75,831 pek a ni tawh. Vaccine pek tawhte chu dose khatna 8,48,825, dose hnihna 6,86,050 leh precautionary dose 40,956 a ni a; Thawhṭanni bikah vaccine dose 1,221 pek a ni.