NE Festival-ah mau chungchang sawiho

Azadi ka Amrit Mahotsav (AKAM) North East Festival neih mekah May 2, Thawhṭanni khan Dawrpui Multipurpose Hall-ah 'Round-up Session of Roundtable on Untapped Eco-Tourism Potential and Role of Bamboo in the NE Region' buatsaih a ni a, chief minister Zoramthanga'n a hmanpui.

CM Zoramthanga chuan, India zalenna kum 75-na puala India sorkarin India ram kil tin hmasawnna pho chhuak zawnga lawmna a buatsaih chu ṭha a tih thu sawiin, "Tun ṭuma thupui zing a mi, bamboo development hi Mizoram mai ni lo, India hmarchhak state-te economy khai chhuaktu pawimawh tak a ni thei," a ti.

Chief Minister hian sorkar department leh mimalte'n puantah leh thiamhnáng hmanga deh chhuah zawrhna dawr an hawnte a tlawh a; NEC leh Planning department-in 'Introducing Mizoram' tih lehkahbu an buatsaih a tlangzarh bawk.

Round-up Session of Roundtable-ah hian Tourism minister Robert Romawia Royte, DoNER joint secretary Saurabh Endley, chief secretary Dr Renu Sharma, Planning secretary Lalmalsawma Pachuau, AKAM NEC nodal officer R Lalrodingi, Tourism director V Lalengmawia leh Horticulture director Dr Elizabeth Saipari ten thu an sawi bawk a ni.