MNYF-in kawngpui chhia an sawifiah

MNF ṭhalaite chuan thuchhuah siamin, NH-54 Kawnpui-Kolasib inkara kawngpui chhia chungchang an sawifiah a; kawng chhia entu Congress ṭhalaite leh Congress party chu kawngpui chhia sawisel ngam tur an ni loa an ngaih thu an tarlang.

MNYF tarlan danin, Kawnpui-Kolasib kawng chu Ministry of Road Transport & Highways (MoRTH) hnuaia awm a ni. kawng siamna turin kum 2018-ah DPR siam a ni a, MoRTH-in sum an pe a, Mizoram PWD pawhin tender tichhuakin, chháng hniam ber chu MoRTH pawmpui tura thawn a ni. MoRTH-in an pawm hmain bid validity a tawp a, contractor tur pawhin a thawk duh lo a, tender chhuah nawn a ni.

Tender chhuah nawn chu hawn a nih hmain MoRTH-in PPC mode-a tender chhuah tur a tih avangin PPC mode hmanga tender chhuah leh a ni a, chumi chhung chuan sanction validity a tawp hman. Contractor hnenah work order pek a nih hmain sanction validity tihnun (revalidate) a ngai a, revalidate turin MoRTH phût angin estimate siamṭhat a ni a; pawm a nih hnuah contractor hnenah work order pek a ni.

Hna ṭan a nih hmain MoRTH-in Network Survey Vehicle (NSV) nei turin Mizoram PWD a phût leh tih sawiin MNYF chuan, "MPWD-in NSV quotation ko mah se, hetiang lam ti chi hi north east-ah pawh an awm mumal lo. Kawng siamṭhat a ṭul tawh êm avangin harsatna tam tak karah chief minister Pu Zoramthanga chuan special case-a siamṭhat a nih theihna turin MoRTH a dàwr a, a hmalakna avangin special case-a siamṭhat a ni dawn ta a ni," an ti.