ZPM flagship programme chu mipui - ZPM Working President

ZPM party chuan nimin khan Siaha bazar traffic point-ah MADC inthlanpui atana campaign khàrna inkhawm an buatsaih a; ZPM working president K Sapdanga chuan, ZPM flagship programme chu mipui an nih thu leh phuahchawpin ram an kaihhruai dawn loh thu a sawi.

ZPM Working President chuan, politics chu ram siamṭhat nan hmang turin mipui a ngen a, "ZPM flagship programme chu mipuite hi kan ni. Phuahchawpin ram hi kan party chuan a kaihruai dawn lo a, a sorkar tûk aṭangin hna a thawk nghal dawn a ni," a ti.

MADC inthlan tur chu ZPM-in district council inthlan an hmachhawn vawi khatna a ni tih sawiin K Sapdanga chuan, "Mipui mimir rilru sûkthlêk kan thlirin lawmna tur kan ngah hle. Mi leh sa kan neih lohnaahte khawtlang hruaitute'n ṭha takin min lo dawngsawng ṭhin a, kan lawm hle a ni," a ti a; party thar an nih angin, an chêt dan leh awm danah pawi an sawi palh a nih chuan ngaihdam a dil a ni.

ZPM Working President chuan, Mara mipui chu sorkar ṭha an neih an duhpui tih sawiin, "Party hrang hranga awm ni mah ila chhung khat vek kan ni a, chuvangin, politics hi inhmélmâk nan hmang loin, inpumkhat nan hmang zawk turin kan inchah a ni. In sawisel vak vak te, dâwt hmanga dik lo taka inpuhchhiatte hi i sim ang u. Keimahni tan vote kan thlâk dawn a, kan ram tana chhiatna thlen turin politics i hmang lo ang u," a ti.

ZPM MADC Election Committee chairman TBC Lalvenchhunga pawhin thu sawiin, campaign chhunga Mara mipuiin an dawnsawn danah lawmthu a sawi a, "Ram siam tak tak duh, dikna leh rinawmna nena ram hruaitu tur duha nghakhlel em em mi tam tak kan rawn hmuh che u hian phûrna leh thathona nasa tak min siam a ni," a ti a; ZPM candidate mi pariatte chu huaisen taka vote turin mipui a sáwm a ni.

Inkhawmah hian ZPM general secretary Lalmuanpuia Punte-in thu a sawi bawk.