MNF hi Pathianin Mizoram puma Rorel tura a ruat a ni - C Lalramzauva

MNF Legal Board chairman C Lalramzauva chuan, Mizorama rorel mektu MNF party chu Pathianin Mizoram puma rorel tura a ruat an nia sawiin, MADC-ah pawh rorel turin Pathianin MNF party a ruat ngei an rin thu a sawi a, chumi tihlawhtling tur chuan MADC mipui a sáwm.

C Lalramzauva hian nimin khan Siaha Press Club-ah thuthar thehdarhtute a kâwm a; MADC-a Congress sorkarah dan bawhchhiatna leh thuneihna hman sualna chi hrang hrang sawi tur a tam nia sawiin, "Misual chu ûm lohin an tlânchhe ṭhin, tia kan pi leh pute’n an sawi ṭhin angin, Congress party MDC zawng zawng chuan anmahni thlangtu mipui phatsanin, anmahni sahimna tur nia an ngaih BJP-ah an tlànchhiatsan a ni," a ti.

MADC hnuaia sorkarna chelh mektu BJP-a lem changte'n BJP kalphung leh hmalaknate a ṭha an tih vang ni loin, anmahni sahimna zawnga Congress party MDC ni tura party mipuite'n an thlan tlin ni chunga mipui an uiresan chu ram mipui tan belh zui tlak an ni tawh lo tih tichiangtu a nih thu a sawi.

C Lalramzauva chuan, hripui léng karah Pathianin mipui harsatna chhâwk zângkhai tur leh hmasawnna kawng hrang hranga ke pên thei turin MNF party hmangin Mizote a hruai zel nia sawiin "Keimahni fel bik vang emaw ni loin, ‘Pathian leh kan ram tan’ tih thuthlung vuan a, chumia innghat chunga kan hotute'n ke an pên zel vang a ni," a ti a; Pathianin rorel turin MNF party a ruat nia sawiin, MADC inthlanah MNF candidate-te vote turin Siaha district mipui a sáwm a ni.