Health care kan siamṭha dawn - Lalsawta

Mizoram Pradesh Congress Committee (MPCC) president Lalsawta chuan, ram neitu, a ṭhatna tak tak duhtute'n Mizoram an enkawl chu an duh ber a nih thu leh Congress sorkar leh hunah health care scheme an siamṭhat dawn thu a sawi.

Nimina Siahaa vantlang inkhawmah thu sawiin Lalsawta chuan, "Congress chuan tuna mipuiin harsatna nasa tak an tawh mekna health care hi kan siamṭha ang a, a hma ang khan mumal takin kan kal pui leh dawn. Mipui tan eizawnna ngêlnghet, kut hnathawktute leh ṭhalaite kalkawng tur pawh mithiamte nen ruahmanna siam tura hmalak a ni ang," a ti.

Lalsawta chuan, "Congress party chuan a ram neitu, a ṭhatna tak tak duhtute'n an thawh a, an neih a, an enkawl hi kan duh ber a ni," a ti a; Mara ram a chhiat a ṭhata mawhphurtu chu Mara mipui an nih thu sawiin, thuneihna insem zâi an duh thu a sawi.

MPCC President chuan, Mizoram sorkarin MADC area a enkawl dan chu a ṭha lo tih sawiin, rilru fím tak pû a, thutlukna dik leh fel siam turin Mara mipui a chah a, "Ṭanpui in ngaih laiin Aizawlah an awm thup a, in vote an mamawh huna in hnena awm ve chauhte hian an ngaihsak tak tak lo che u. Hetiang hi nangni nen kan tihreh a, kan ram hi kan siam a, ṭhat loh theih lohna báwm kan siam thuai a ngai a ni," a ti.

MPCC treasurer Zodintluanga Ralte pawhin thu sawiin, Congress party chu a din aṭanga hnam tlém zawkte ngaihtuah ṭhin, mi retheite hmangaihtu leh ngaihsaktu a nia sawiin, "Mizoramin harsatna a tawh apiangin mipui kaltlangin Pathianin Congress party a tung ding leh ziah ṭhin," a ti a; MNF sorkarah mipui pawisain mipui a thleng phâk lo a, mipuiin sum leh páiah harsatna naménlo an tawh lai leh hripui avanga an dinhmun a chhiat em em laiin Chief Minister-in a unaute pawisa nuai tam tak a kawlsak thu a sawi.