BJP hi Kristiante tiduhdahtu a ni lo - Utarra Debbarma

BJP National ST Morcha secretary (Mizoram changtu) Utarra Debbarma chuan, party ṭhenkhatin BJP chu Kristianna nen inmil lo ang leh Kristiante tiduhdahtu anga an sawi ṭhin chu thu dik lo a nih thu a sawi.

Utarra Debbarma hian nimin khan BJP pisaah thu sawiin, "BJP hi party ṭhenkhat leh mi ṭhenkhatte'n Kristianna nen inmil lo anga an sawi leh Kristiante tiduhdah tu anga an sawi ṭhin hi thu dik lo leh belhchian dâwl lo a ni a, BJP Pu Modi kaihhruai hian a hnathawh leh a tum ber chu mi tinin an chanvo an chang tur a ni tih a ni," a ti.

Narendra Modi hruai sorkar laipui hnuaiah India rama miretheite'n ni tin mamawh ei leh bâr tur tam tak awlsam zawk leh tláwm zawkin an nei thei tih sawiin Debbarma chuan, "Free gas connection, free ration, Housing for All, free water connection (Jal Jeevan Mission) kaltlang te, free electric connection-te bakah hamṭhatna tam tak min pe a ni," a ti a; chu'ngte chu state sorkar hmalakna ni loin, sorkar laipuiin miretheite tan state sorkar kaltlanga a pek a nih thu a sawi.

Utarra Debbarma chuan, sorkar laipui scheme tam taka hamṭhatnate chu Mizorama miretheite'n an dawn tur ang an la dawng lo tih sawiin, "Scheme tam tak hi state sorkar hian an bawhzui duh lo. Mizoramah miretheite'n central aṭanga hamṭhatna hrang hrang a nihna anga an dawn theihna turin Mizoramin BJP sorkar a mamawh a ni," a ti.

Kum 2023-a Mizoram inthlanpui awm turah BJP chuan MLA pakhat aṭangin MLA 30 an neih tur thu Utarra Debbarma chuan a sawi bawk.