Lungleiah municipal chungchang zirho

Lunglei District Congress Committee chuan nimin khan Lungleia Congress Bhavan-ah municipality chungchang zirhona an buatsaih a, Congress party thupuangtu Dr Lallianchhunga'n municipality nihphung, Mizorama kalpui dan leh Aizawla hman mek a nih dante a sawi a, AMC councillor Rosiamngheta'n Aizawl Municipal Corporation a taka kalpui dan a sawifiah.

Dr Lallianchhunga chuan, AMC chu MNF sorkar laiin a thua din a ni tih sawiin, "Inthlan an huaihawt lo a, rules hrang hrang pawh an la peih lo. Municipal dan hi vai ram state eng emaw zatte tih dan entawna duan a nih avangin Mizo khawtlang nun nen a inmil lo a, hman chi pawh a ni lo," a ti.

Congress sorkarin municipal dan a siamṭha tih sawiin Lallianchhunga chuan, "Mizo khawtlang nun mil thei ber turin a duang ṭha a, chu chu Congress sorkar lai kum 2009 khan Mizoram Legislative Assembly-in a pawm ta a ni," a ti a; Congress sorkarin AMC tana thuneihna a pek bâk MNF sorkarin thuneihna dang pek belh a la neih loh thu a sawi.

Rosiamngheta chuan, Congress party chuan municipal chu Lunglei tana an duh ber a ni lo mai thei tih a sawi rualin, sorkarin municipal din a tum tho si chuan a kalphung zirho a ṭul tih a sawi a, "MNF chuan eng eng emaw an rawn tiam leh vak ang che u. Hei erawh hre reng ula, municipal kan neih turah hian Lunglei tana mi ṭhahnemngai tur, mi ṭangkai tur chauh i vote ang u," tiin a chah. Mipui tana phurrit lo thei ang berin LMC-ah sorkarna kalpui a ngaih tur thu a sawi bawk.