BJP-in MCC bawhchhiaah an puh

BJP, Siaha district President chuan MNF Siaha district Vice President chu Election Model Code of Conduct bawhchhiaah puhin, May 2, Thawhṭanni khan Returning Officer hnenah ziakin a zualko.

BJP thuchhuah tarlan danin, MADC huam chhungah Model Code of Conduct puan a nih hnuah MNF Siaha district Vice President-in Tipi Primary School girls toilet sakna tur Rs 3,50,000 pekna a tichhuak. Returning Officer pawhin MNF Vice President chu insawifiah turin a hriattir nghal a ni.

Niminah pawh Supply Minister ruahmanna angin Tipa aṭangin Theiva khuaah MNF mi leh sate tan buhfai ṭhahnem tak pek chhuah a ni bawk tih sawiin BJP chuan, "Hei hi Model Code of Conduct bawhchhiatna leh Maraland mipui hmuhsitna a ni. Mara mipui duhsak hmel taka election dawn apianga thil an sem ṭhin hi sim turin BJP, Siaha district chuan MNF ministry kan hriattir a ni," an ti. Hemi chungchangah hian BJP chuan Returning Officer-ah complaint an thehlut bawk.