Mizoram Christian College buaipui mek

Mizoram Synod chuan academic session 2020-21 aṭangin college thar - Mizoram Christian College (MCC)-ah zirna ṭan turin hma a la mek a, thui tak hmalak a nih tawh bakah, principal atan Rev. Dr Lalchungnunga, Zarkawt a ruat tawh.

Synod moderator Rev. R Lalchangliana'n zawhna chhanga a sawi danin, MCC-ah hian B.A, B.Com. leh Bachelor of Business Administration (BBA) zirna hawn nghal tum niin, teaching faculty (zirtirtu) 14 vel hmanga a bul ṭan tum a ni a; bul ṭannaah hian Mission Veng­thlanga Synod building thar hman a ni dawn a, campus nghet erawh chu Tanhril ramah buaipui mek a ni.

Zawhna chhangin Synod Moderator chuan, MCC-ah hian department/subject tinah zirlai 30 zel lâk tum a nih thu a sawi a, "Sorkar laipuiin ṭan hun tur (September 2020) a tihah ṭan tum a ni," a ti a; principal ruat a nih tawh thu leh zirtirtu turte pawh lâk thuai tum a nih thu a sawi.

MCC principal atana Rev. Dr Lalchungnunga ruatna hi July 8, Nilaini khan tihchhuah a ni a, kum hnih atan appointment pek a ni. Amah hi October 28, 1951-a piang a ni a, Gauhati University aṭangin kum 1976-ah MA (Political Science) zawh hnuah kum 1981-ah JNU, Delhi aṭangin Master of Philosophy leh kum 1987-ah NEHU aṭang­in Doctor of Philosophy a zo. May 2011 khan William Carey University, USA-in Doctor of Divinity (DD) a pe bawk.

Rev. Dr Lalchung­nunga hi tuna Govt. Aizawl College-ah zirtirtu ni ṭhinin, vice principal a ni hman a, kum 1991-ah missionary turin Interserve hnuaiah a inpe. Kum 1994 aṭangin Aizawl Theological College-ah Bachelor of Divinity (BD) a zir leh a, kum 1998-ah kum 1998-ah Mizoram Synod-in minister atan a nemnghet. Kum 1998 aṭanga October 2011 thleng Serampore College-ah principal a ni a; March 1, 2012 aṭanga October 31, 2017 chhung MBSE chairman a ni.