'Loneitu' mobile application tlangzarh

Agriculture minister C Lalrinsanga chuan nimin khan Agriculture committee room-ah loneitute'n awlsam taka mobile phone hmanga lo neih leh a kaihhnawih thil hrang hrang an hriat theihna tur mobile application 'Loneitu' tih chu a tlangzarh.

C Lalrinsanga chuan, 'Loneitu' apps chu Mizorama loneitu zawng zawngin hmang ṭangkai se a duh thu sawiin, "Hun harsa kan tawh mek laiin, Pathian malsawmna kan dawn theihna tur atana hmanraw ṭangkai ni se ka duh. Covid-19 léng leh inkhàrkhipin loneitute tan harsatna nasa takin a thlen a, loneitute harsatna chu department harsatna a ni tih hriain, a sutkian nan department chuan hma a la a ni," a ti.

Khawvel changkang zelah information techno­logy thar leh hmanruate lo neih lamah leh loneitute hman ṭangkai theih thil ngaihtuah a, hman zel a pawimawh tih sawiin Minister chuan, "Hengte hian hlâwkna bakah, loneitute tan awlsam zawka hmasawnna a siamsak thei a ni," a ti a; SEDP hnuaiah Mizorama a vawi khat nan vaimim chìn tam tum a nih thu a sawi.

Loneitu mobile apps hi Play Store aṭanga download theih a ni a, install tawh chuan internet hmang lo pawhin loneih kaihhnawia hriat duhte en theihna a ni. Thlai chìn dan hrang hrang te, thlai chi mamawh zat, thlai thar theih zat, thlai enkawl dan, thlai vèn dan leh thil dangte hriat theih a ni. Application-ah hian loneitute'n an lo neih chungchanga official-te hnena rang taka report an pek theihna, 'Thil ṭul report-na' dah tel a ni a; thlai ei chhetu, sazu, pangang, leh khau puang thutah pawh rang takin an hriattir thei dawn a ni.