ASF vanga vawk suat neitute hnena Zangnadawmna pek hun tur la hre lo
Vawk pùl hri, African Swine Fever (ASF) vanga kum 2021 chhunga vawk suat neitute hnena zangnadawmna pek tur zinga a zatve, Rs 5,84,97,000 chu Animal Husbandry & Veterinary (AH&Vety) department-in Finance department-ah an dil mek a, an dawn theih hun tur hriat a la ni lo. Hetih lai hian, kum 2022-a vawk suat neitute chu sorkar laipuiah zangnadawmna dilsak a ni leh dawn.
Vanglaini palai zawhna chhangin AH&Vety department hotute chuan, ASF vanga kum 2021-a vawk suat neitute tan Mizoram sorkarah zangnadawmna pek tur an dil mek thu an sawi a, "Dilna kan thehlut tawh a, file kal kual chhung nen a kawng a thui avangin sorkarin min pek hun tur a sawi theih loh," an ti.
Vawk suat ni lo, ASF vanga vawk thite zangnadawmna tur chungchang zawhna chhangin AH&Vety hotute chuan, Planning & Programme Implementation department-ah sum an dil a, Planning lamin project-ah an dah thu an sawi.
AH&Vety hotute chuan, kum 2022-a ASF vanga vawk suat neitute tan sorkar laipuiah zangnadawmna an dil leh dawn thu te, Mizoram pumah ASF laka invênna khauh taka an kalpui thu leh mipuiin sorkar thuchhuahte ṭha takin zawm se an duh thute an sawi bawk.
Tarlan tawh angin, Mizoram sorkar chuan kum 2021-a ASF vanga vawk suat neitute tan scheme awm sa hnuaiah sorkar laipuia Ministry of Fisheries, Animal Husbandry & Dairying-ah zangnadawmna Rs 11,69,94,414 a dil a; scheme-ah hian sorkar laipui leh Mizoram sorkarin zangnadawmna pek tur chu a zatve (50:50)-in an intum sem tur a ni.
Sorkar laipui chuan Mizoram sorkar hnenah March 22, 2022 khan ASF vanga vawk suat neitute zangnadawmna tur aṭanga a zatve Rs 5,84,97,000 a rawn pe tawh a; Mizoram sorkar chuan a tum ve tur a la pe lo.
Nimin thleng khan Mizoramah kumin 2022 chhungin ASF vangin vawk 1,805 a thi tawh a, vawk suat 707 a awm tawh bawk. ASF hi district paruka khua/veng 29-ah a léng mek a ni.