MADC inthlanpui neih a ni dawn ta

Vawiin hian Mara Autonomous District Council (MADC)-a member of district council (MDC) inthlanpui neih a ni dawn a, zing dar 7 aṭanga tlai dar 5 thleng vote thlak hun hawn a ni ang. MADC sorkar ding lai hun chu May 15, 2022-ah a tàwp dawn a ni.

MADC MDC inthlan turah hian seat 25 chuh turin mi 86-in hming an pe lut a, hming pek luhte chu April 14 khan endik niin, pawm vek a ni a; a hnuah independent-a chuh tum mi pakhat a inhnuhdawh avangin candidate 85 an awm dawn a ni.

MADC inthlanpuiah hian MNF leh BJP-in seat awm zawng zawng an chuh dawn a, Congress party-in seat 23, ZPM-in seat pariat an chuh dawn a, independent candidate pali an awm bawk. Hming pe lut zingah MDC ni lai 23 an awm a, chung zinga 13 chu BJP, MNF paruk, Congress pathum leh ZPM pakhat (nominated) an ni.

MADC inthlan vawi 12-naah hian MDC constituency 25-ah polling station 81 a awm a, voter 42,326 awmin, voter hmeichhia 21,960 leh mipa 20,366 an ni. Vote thlakna atan electronic voting machine hman a ni dawn.

Voter tamna ber Siaha East-II bialah voter 2,808 an awm a, voter tlemna ber Amohtlah bialah voter 1,049 an awm a ni. Polling station-ah Amotlah biala Riasikah PS chu voter tlemna ber niin, voter 95 an awm a; voter tamna ber polling station chu Siaha North-I biala College Vaih-I niin voter 1,055 an awm.

Inthlana duty tur polling official-te chu nimin zing dar 6 khan DC pisa tual aṭangin returning officer Lalsangliana, Siaha DC-in a vailiam. Nimina vailiamte hi polling station 69-a duty turte an ni a; polling station hla zual 12-a duty turte chu May 3, Thawhlehni khan vailiam an lo ni tawh a ni.