India freedom fighter chawimawi

India-in zalenna a sualnaa tel Darthawma Renthlei (L), Lunglei Chanmari chu Lunglei DC Kulothu-ngan A chuan India ram zalenna kum 75-na lawmna, Azadi Ka Amrit Mahotsav (AKAM) pualin nimin khan chawimawina thuchei a hlàn. Certificate hi Darthawma Renthlei (L) chhungte hnenah hlan a ni.

Chawimawina inkhawm hi Lunglei SDO (Sadar) C Lalduhzuali'n a kaihruai a; Kulothungan A chuan, India zalenna kum 75 lawmna kal zelah India sorkarin zalenna sualtu mi 75 a thlan zingah Darthawma Renthlei (L) a tel thu a sawi.

Lunglei DC chuan, "Chawimawi tura Pu Darthawma a tel hi ka lawmpuiin ka chhuang hle. India-in zalenna a sualna kawngah nasa takin thâ leh zung a séng a, Indian National Army-ah telin, India-in zalenna a sual chhuahnaah a thawh hlâwk hle. A inpekna leh huaisennate kha ṭhangtharte'n kan entawn zel dawn a ni," a ti.

Darthawma Renthei (L) hi kum 1920 khan Pukpui khuaah a piang a, November 27, 1940-ah British Army a zawm. Kum 1941 khan Malaysia-a thawn zingah telin, kum 1942-a Japan leh British sipaite Prisoner of War-a man zingah a tel. Jail aṭanga a chhuah hnuah Indian National Army a zawm a, man niin, kum 1946-ah chhuah zalen a ni.

India ramin zalenna a hmuh hnuah Darthawma Renthlei chu Freedom Fighter of India zingah pawm a ni a, India zalenna sualtute tana siam Tamrapatra Award chu August 15, 1973-ah hlan a ni.

Amah hi Lunglei Chanmari-ah a nupui fanaute nen an cheng a, July 21, 2019 khan a thi a ni.