Kuminah Kolasib district-ah Ṭum 312 kângmei a chhuak

Kolasib District Fire Prevention Committee chu nimin khan an chairman John LT Sanga, bawrhsap hoin an ṭhukhawm a; kumin 2022-ah ṭum 312 kângmei a chhuak tawh a, lo hâl 300 leh ram kâng ṭum 12 a awm tawh thu tarlan a ni.

Kolasib district forest officer Margaret Lalramchhani tarlan danin, kum 2022 chhungin Kolasib district-ah ram hectare 464.99-a zau lo hâl a ni a, hectare 4.73-a zau ram tihkan a ni. Serlui tuikhuah kama kângmei chhuaka mawhphurtu dap chhuah a nih theih nan Kolasib Police Station-ah thubuai thehluh a ni bawk.

Ṭhutkhawmah hian hmunphiah chíngtute'n a hun taka ram an hâl hman loh ṭhin avangin harsatna an tawh thu tarlan a ni a, lo neia eizawng chhungkaw 1,726-te'n buh ṭin 3,170 hmuna zau lo neihna tur an hâl a ni. Hunbi tuk chhunga lo hâl hman lo, a hranpaa dilna thehlut mi 40 an awm.

Serlui-B Hydel Project leh Tuirial Hydel Project tuikhuah kam ramngaw chereu mek siamṭhat leh humhalh dan tur leh dan loa huan/lo siam luite hrem an nih tur thu sawi a ni bawk.