Serchhipah training hawng

Mizoram Youth Commission (MYC) hmalaknaa Covid-19 léng vanga state danga hna thawk Mizo ṭhalai, Mizorama hawte tana eizawnna péng hrang hrang inzirtirna, Livelihood Generation for Returned Migrant Workers due to Covid-19 chu nimin khan Serchhip additional DC Lalmuansanga Ralte-in Serchhip District Panchayati Resource Centre-ah a hawng.

Lalmuansanga Ralte chuan, thiamna chu theihna petu leh mi ṭangkaia siamtu a nih thu sawiin, "Kan nun tihlutu a ni a, thiamna leh hriatna ngaináa theihtawp chhuaha zawngtute chu rei lo teah mi hlawhtling, puitling hmasaah an lo chhuak mai ṭhin," a ti a; training-a kal turte chu theihtawp chhuah turin a fuih.

Training coordinator F Lalnisai tarlan danin, training kal duhte zawnnaah beisei zat dilna an hmu lo. Ṭhalaite tana inzirna ṭangkai tak a nih avangin YMA leh MHIP hruaitute phungbawmah an sáwm a, migrant worker ni chiah lote pawh eng emaw zat telh an ni a; zir tur chi thum - cement mistiri, ei tur sawngbawl leh vawk vulhte thlan a ni.

Cement mistiri-ah seat 40 awmin SIRDPR mithiamte'n an zirtir dawn a, food processing-ah seat 20 awmin, Lalhmangaihzuali, M.Sc (Food & Nutrition) leh KVK-a mi K Lalmalsawmi ten an zirtir dawn a, vawk vulhah seat 20 awmin, Serchhipa AH&Vety department mithiamte'n an zirtir dawn a ni.