KHAWTHLIR

Thisen pe
Fundamental Baptist Church ṭhalaite chuan nimin khan Civil Hospital, Aizawl tan thisen unit 29 an pe a, petute mipa 25 leh hmeichhia pali an ni.

Heroin man
Champhai police-te chuan May 3, Thawhlehni khan Chalbawia Junction Khankawn checkgate-ah heroin gram 127 leh a neitua puh Lalhriatdiki (24) w/o Lalpeksanga, Bungtlang South, Lawngtlai district an man. Heroin an man hi international market-ah cheng nuai 63.5 hû a ni.

Minister tel
India President Ram Nath Kovind hoin nimin khan Guwahati-ah Azadi ka Amrit Mahotsav North East Festival khârna hun hman a ni a, Mizoram aṭangin Tourism minister Robert Romawia Royte a tel. Inkhawmah hian sorkar laipuia Tourism leh DoNER changtu minister G Kishan Reddy, Law minister Kiren Rijiju leh DoNER minister of state BL Verma te bakah, state hrang hranga chief minister leh minister-te an tel bawk. India hmarchhak bial hmasawnna turte sawiho nghal a ni.

Mi 8,48,857-in vaccine la tawh
Mizoramah May 3, Thawhlehni thlengin mi 8,48,857 hnenah Covid-19 vaccine dose 15,75,863 pek a ni tawh. Vaccine pek tawhte chu dose khatna 8,48,857, dose hnihna 6,86,050 leh precautionary dose 40,956 a ni. Thawhlehni bikah vaccine dose 32 chiah pek a ni a, dose khatna vek a ni.

ILP nei loa Mizorama luh tum
Vairengte SDO (Civil) Neng Thianlala leh Vairengte khawtlang hruaitute May 2, 2022-a an inkawmnaah, tun hnaiah hnam dang, Inner Line Permit (ILP) nei lote Vairengte VC-IV (State Veng) kaltlanga Assam aṭanga Mizorama luh tum an tam ṭhin thu tarlan a ni. Thu dawn danin, Assam aṭanga ILP nei loa Mizorama luh tumte chu a huhoin an kal ṭhin a, police checkgate helin, Mautui zau leh Saihapui-V aṭangtein an lût tlangpui. Vairengtea VC, YMA leh police-te'n ILP nei loa Mizorama luh tum man an nei nual tawh a ni.