Mizoram Assembly-ah kum 50 chhungin MLA 232 an awm, mi 140 an la dam

Mizoram Legislative Assembly a din hnuah kum 50 chhungin MLA mi 232 an awm tawh a, Assembly session vawi 138 neih ni tawhin, vawi 955 ṭhutkhawm (sitting) neih a ni tawh.

Mizoram Legislative Assembly hian May 10, 2022 hian kum 50 a tling dawn a, golden jubilee lawm mek a ni. Golden jubilee puala sorkar thuchhuahin Legislative Assembly chungchang a tarlan danin, kum 50 chhunga MLA ni tawh mi 232 zinga mi 140 chu tunah an la dam a, mi 92 an thi tawh a ni.

Kum 50 chhungin Assembly session vawi 138 neih a ni tawh a, government bill 488 lut tawhin, 477 pawm a ni a, 11 pawm a ni lo. Private member bill panga lut tawhin, pawm a ni lo vek a; Assembly committee hrang hrangin House-ah report 500 chuang an pe (present) tawh bawk.

Kum 1952 khan Assam state hnuaiah Lushai Hills district a piang a, a hnuah Mizo Dis­trict Council tiin a hming thlak a ni. Kum 1972-a union territory a nih thlengin district council sorkar term li a awm hman. Kum 1972-a UT-a hlàn kài a nih hnuah Assembly session hmasa ber chu May 10, 1972-ah neih a ni a, session neih hmasak ber ní hi Mizoram Legislative Assembly din ní-ah pawm a ni.

Mizoram UT a nih laiin MLA 33 an awm thei a, chu'ng zinga 30 chu thlan niin, pathum erawh chu ruat (nominate) an ni thung a, UT nih chhungin inthlanpui vawi li a awm. February 20, 1987-ah Mizoram chu state puitling a ni a, state a nih hnuah MLA awm thei zat pawh 40-ah a pung a, nominate seat a awm zui lo. State nih hnuah Assembly inthlanpui vawi riat a awm tawh.