Vawiinah President a lo zin dawn

President Ram Nath Kovind chu vawiin hian Mizoramah a rawn zin dawn a, naktukah Mizoram University convocation a hmanpui ang.

President lo zin tur chungchangah hian Aizawl DC Dr Lalhriatzuali Ralte leh Aizawl SP C Lalruaia te chuan nimin khan thuchhuah an siam a; Aizawl khawpui chhung bakah, Lengpui Airport leh a chhehvel khuaah May 5-6, 2022 chhungin phalna nei loa drone/aerial camera thlawhtir leh hman phal a ni lo a, thupek bawhchhiate chu IPC Section 188 hmanga hrem theih an ni.

India President lo zin tur chung­changa Traffic SP Rodingliana Chawngthu-in hriattir a lo chhuah tawhah chuan, President chêtvelna tibahlah thei thil kawngpui dungah a awm a thiang lo a, hriat loh vanga buaina tawh a nih loh nan leh ṭul loa hun sèn thlawn a nih loh nan lirthei khalhtute inhmakhua a, pumpelh dan kawng zawng tura chah an ni.

MIPUI HRIAT TUR
1) May 5-6 chhungin District Magistrate hriatpuina tel loin Ṭhuampui Helipad leh Raj Bhavan inkar, Raj Bhavan leh Mizoram University inkar leh, Leng­pui Airport aṭanga km. khat bial chhung­ah mipui punkhawm khap a ni.
2) May 5 chawhnu dar 2 leh tlai dar 6 inkarah MZU main gate bul hnaiah dawr/bazar hawn phal a ni lo.
3) President chêt velna kawngpuiah lirthei leh bungrua dah phal a ni lo.
4) May 5 zing dar 7 aṭanga chhun dar 12 inkar leh May 6, 2022 zing dar 6 leh chawhma dar 10:30 inkarah Lengpui-Phunchawng via Sihhmui kawngpui dungah lirthei leh bungrua dah phal a ni lo.