Union Minister-in Robert Romawia a zilh - Mizoram BJP

BJP, Mizoram Pradesh chuan thuchhuah siamin, MADC inthlan atana campaign tura rawn zin sorkar laipuia Minority Affairs minister of state John Barla-a'n May 3, Thawhlehni khan Lengpui Airport-ah Mizoram minister of state Robert Romawia Royte a zilh niin an tarlang.

John Barla haw tur leh Robert Romawia Royte Guwahati-a zin tur chu Lengpui Airport-ah an inhmu tih tarlangin BJP chuan, "Pu John Barla hian 'Siaha district hmun hrang hrang ka tlawh a, kawng chhia a tam hle. Siaha district tana central sorkarin state sorkara pawisa a pek tam tak ngaihtuahin mipui khawsak, ei leh bâra an dinhmun a la ngaihtuahawm hle. Mizoram sorkar hian buaipui hmasak tur zawk buaipui ṭhin rawh u,' tiin tlang takin a zilh a ni," an ti.

Mizoram BJP chuan, Robert Romawia'n Union Minister hnena a sawi anga tarlan, 'Mizoram pum minority kan ni' tia a sawi chu Union Minister-in minority area a sawi dan ni lo a, thu dik lo a nih thu an tarlang a; minority chungchang chu sawifiah turin District Council & Minority Affairs Minister an phût.

Minister-te'n department hrang hrang chanvo insemin hna an thawk ṭhin tih sawiin BJP chuan, "Pu RRR hian a duhàm luatah sorkar Allocation of Business pawh a hre hrang lo der nge, a thliar hrang thiam lo zawk tih hi kan zawhna a ni a, hetiang a nih chuan minister ni tlâk loah kan ngai," an ti a; Robert Romawia chu dâwt sawi bànsan a, Mizoram mipui bum tum ringawt lo a, thu dik tak mipui hrilh turin an phût tih an tarlang a ni.