RO hnenah Supply Minister insawifiah

May 3, Thawhlehnia Theiva khuaa buhfai sem tur dah chungchangah Food, Civil Supplies and Consumer Affairs (FCSCA) minister K Lalrinliana lakah BJP, Siaha district-in MADC inthlana Returning Officer hnenah complaint an thehlut a; Minister chuan nimin khan insawifiahna RO hnenah a thawn.

BJP chuan, May 3, 2022 chawhnu dar 1:30 khan Supply minister K Lalrinliana'n Tipa-a FCSCA inspector kaltlangin Theiva khuaah 407 truck MZ-01 R-9670 hmangin buhfai sem tur a dahtir a; BJP-in complaint an thehluh avangin show cause notice a pe nghal a, May 10, 2022 chhun dar 11:30 hmaa insawifiahna thehlut turin a hriattir a ni.

FCSCA minister K Lalrinliana chuan, Theiva khuaah mipuiin ration buhfai an dawn an kham loh thu te, ration card leh Aadhaar an la thlun zawm loh avangin ration an dawn ṭhin aia tlem an dawn thute a tarlang a, "Heng ang hi Mizoram hmun dangah pawh an awm nual avangin special allotment retailer kaltlangin tihsak an ni. Harsatna an rawn thlen hian bialtu inspector hi sorkar thu awm sa anga hma la tura hriattir a ni. Amaherawhchu, Election Model Code of Conduct hman lai a nih angin inthlan zawh hmaa pe chhuak lo tura hrilh hriat a ni a, pek chhuah ala ni lo," a ti.

Hetih lai hian, Siaha district BJP vêkin Model Code of Conduct (MCC) bawhchhiaa minister of state Robert Romawia Royte an puhna chungchangah BJP-te chuan RO hnena complaint an thehluh tawh chu an sût leh nia tarlan a ni.

April 27, 2022-a Robert Romawia'n Thiahra (Phalhrang) khua a tlawhnaah, a fapa leh a thawhpuite'n Thiahra field laih zauhna tur cheng nuai 10 an pek thu a puan avangin MCC-ah ngaiin BJP chuan RO hnenah complaint an thehlut a, mahse, a hnuah BJP chuan complaint chu an sût leh a ni.