Sorkar hnathawkte hlawh daih tur Budget-ah sum dah a ni - Finance dept.

Finance department chuan thuchhuah siamin, Mizoram budget-a sorkar hnathawkte hlawh tur dah chungchang an sawifiah a; kum 2022-23 budget-ah sorkar hnathawkte hlawh tur daih sum dah a nih thu an tarlang.

Budget buatsaih dawnah department tinah an hlawh mamawh zat tur hisâp chu Finance department-ah pe tura hrilh vek an nih thu sawiin Finance department chuan, "Hetah hian a tlangpuiin department-te'n an vènthàwn leh ṭhahnemngaihna avangin an pe tam hle ṭhin. A tlangpuiin hlawh tura budget-a dah hi hman sên a ni ngai lo," an ti.

Finance department tarlan danin, sorkar kum kal ta 2021-22 chhunga sorkar hnathawkte hlawh tur budget-a dah chu tuna chhût chhuah tawh chinah cheng vbc. 336 hman zawh loh a ni a; chhût chhuah kim vek hunah chuan hman zawh loh cheng vbc. 400 chuang a tling turah ngaih a ni.

Budget buatsaihtu Finance department chuan, kum 2022-23 budget-ah chuan hlawh atana sum dah hman zawh loh a awm tawh loh nan, a tak taka mamawh zat tur hisâpin budget-ah sorkar hnathawk hlawh tur dah a nih thu an tarlang a, "Tuna budget-a hlawh tur dah hian daih ngei tura chhûta dah a ni. Budget siam laia la awm lo, mamawh thar lo thleng palh a awm a nih pawhin chu'ngte pawh chu mamawh ang zelin pek tura inruahman zel a ni ang," an ti.