District 5-ah hripui vei 44 hmuh a ni

May 3, Thawhlehni khan Mizoramah Covid-19 vei mi 44 hmuh chhuah a ni a, Mizoram disrtrict 11 zinga district pangaa mite niin, district parukah hripui vei hmuh a ni lo. Nimin khan hripui vei dam tawh mi 70 chhuahtir an ni a, Covid-19 vei thi an awm lo.

Thawhlehnia hripui vei hmuh chhuahte chu mipa 20 leh hmeichhia 24 an ni a; RAT hmanga hmuh vek niin, RT-PCR leh TrueNAT hmangin swab sample endik ni mahse positive an awm lo.

Covid-19 positive hmuh thar mi 44 zingah district khawpuia mi pasarih an tel a, a bâk zawng chu district khawpui pawn lama mi an ni. Hmuifang khuaah mi 16 hmuh chhuah a ni a, Sialsuk khuaah mi 11 hmuh chhuah a ni bawk.

IDSP record angin, Mizoramah Covid-19 vei 2,27,600 hmuh chhuah a ni tawh a, mipa 1,05,982 leh hmeichhia 1,21,618 an ni a, mipa aiin hmeichhia 15,636-in an tam zawk. Nimin tlai dar 5 thleng khan mi 2,26,540 (99.53%) chhuahtir an ni tawh a, mi 697 (0.31%) thi tawhin, enkawl mek mi 363 (0.16%) an awm.

Nimin tlai dinhmun angin, Mizorama district zawng zawngah Covid-19 positive inenkawl lai mi 100 awm tlinna a awm rih lo a, enkawl lai tamna ber Aizawl district-ah mi 97 an awm. Siaha, Lawngtlai, Kolasib leh Champhai district-ah positive enkawl mek mi 10 aia tlem ṭheuh an awm a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,600 chu mi 1,000 zelah hripui vei mi 207 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.