Mizorama HIV/AIDS hluar chhan zir turin US-in Mizoramah researcher tirh a inhuam
Ni hnih cháma Aizawla rawn zin, United States ambassador to India Richard R Verma chuan, HIV/AIDS dona kawngah India leh US-in thawh dunna ṭha tak an neih thu sawiin, Mizorama HIV/AIDS hluar chhan zir chiang turin US mithiam (researcher)-te Mizorama tirh a inhuam thu a sawi.
US ambassador Richard Verma hian nimin chhun khan Aijal Club-ah thuthar thehdarhtute a kâwm a; Mizorama HIV/AIDS dona atan US sorkarin ṭanpuina a pek theih dan a awm leh awm loh zawhna chhangin, US-in a puih theih thu leh India rama HIV/AIDS donaah a remchan angin a puih mek thu a sawi a, "HIV/AIDS donaa kan ṭanpuinate kan la tipung zel a ni," a ti.
Richard Verma chuan, India ramah leh Mizoramah pawh HIV/AIDS do nan Project Sunrise hmangin USA-in hna a thawh thu te, ruihhlo (damdawi hmang sual) a tlakhniam theih nan tha an thawh thute a sawi bawk.
US palai hian nimin zing khan Mizoram State AIDS Control Society (MSACS) pisa tlawhin, hotute nen an inkâwm a; Richard Verma chuan, Mizorama HIV/AIDS hluar lutuk chu a ngaimawh thu leh India ram chu hriselna kawngah nasa taka hmalakpuia a ṭul anga ṭanpui zel an inhuam thu te, Mizorama HIV/AIDS hluar chhan zir chiang turin researcher-te tirh an huam thute a sawi.
MSACS hotute chuan, Mizoram chu India rama HIV/AIDS vei tam lamah pahnihna a nih thu an sawi a; kum 2000 hma lamah HIV/AIDS thlentu ber chu damdawi hman sual a ni a, kum 2000 hnu lamah chuan mipat hmeichhiatna hman khawlohna a nih thu an tarlang.
Excise & Narcotics department (END) hmalakna chungchanga zawhna chhangin Richard Verma chuan, Mizoram END chu hmanraw lamah te, training pek kawngah te, inkalpawhna hmanraw lamahte an puih ṭhin thu sawiin, "Ramria dan loa thil tih awm ṭhin kan vei a, hmanrua leh thil danga ṭanpuina kan pek ṭhin a remchan anga chhunzawma pek belh zel kan tum," a ti.
Mizoram ṭanpui an inhuam tih sawiin, "Hriselna kan ngai pawimawh a, natna zawn chhuah leh enkawl kawngah a theih ang anga ṭanpui kan duh," a ti. Hmarchhak state dangte nen kawng tam takah thawhho theihna a awm thu sawiin, "Tourism leh energy lamah hmalak theihna tur a awm a, US-a investor-te leh company-te pawh an lo luh theih kan beisei," a ti bawk.
US ambassador hi Kolkata-a US Consulate General Craig L Hall bakah Consul for Political and Economic Affairs Prasenjit Gupta, assistant public affairs officer Greg Pardo, media specialist Deepa Datta leh political specialist Tinku Roy ten an ṭawiawm a ni.
Nimin zing khan US ambassador hian US sorkar tirha Mizoram aṭanga USA-a International Visitor Leadership Program-a kal tawhte tukṭhuan a eipui bawk a ni.