Sorkar laipui ruahmanna Mizoram sorkarin Party worker-te tan chauh hmang suh se - Mizoram BJP

BJP, Mizoram Pradesh president Vanlalhmuaka chuan nimin khan Aizawl Press Club-ah thuthar thehdarhtute kâwmin, sorkar laipui scheme - Aatmanirbhar Bharat chung­chang a sawifiah a, "Kan state sorkar hian party worker-te tan chauh ni loin hma la rawh se," a ti.

Vanlalhmuaka chuan, Aatmanirbhar Bharat chu Covid-19 dona atan chauha buatsaih a nih loh thu sawiin, "New India dinna atan leh New India Identity atan tih a ni. Prime Minister chuan May 12, 2020 khan Aatmanirbhar Bharat hi a puang a, Finance minister Nirmala Sitharaman chuan May 13-17 chhungin Aamanirbhar Bharat kalpui dan tur package hrang hrang fiah takin a puang tawh," a ti a; Modi-a sorkar thla hnih pawh a la tlin hmain Aatmanirbhar Bharat chu a taka kalpui hman a nih thu a sawi.

Aatmanirbhar Bharat chu Mizoram sorkarin sorkar laipui aṭanga sum hmuhna satliah atan mai mai kalpui lo se an duh thu sawiin BJP President chuan, "Mizoramin ei leh bara kan intodelhna atan, employment generate-na atan ruahmanna fel tak, a party worker-te tan chauh ni loin, state chhung mipuite chhawr theih turin hma la rawh se," a ti.

    Emergency Credit Line Guarantee Scheme (ECLGS) hnuaiah MSME leh business unit mi nuai 30-te'n lei rem an rah theih nan loan cheng vbc. 1,10,000 July 1, 2020 thlengin sanction a ni tawh. Mizoram ECGLS hnuaiah MSME & business unit neitu mi 2,729 hnenah loan pek tawh niin, chu'ng zinga 1,720 hnenah loan pek chhuah a ni tawh. Sum faia loan pek tawh zat chu cheng vbc. 35.23 a ni a, cheng vbc. 22.83 pek chhuah a ni tawh.

    MSME unit harsatna tâwkte chhan chhuah nan  cheng vbc. 20,000 Credit Guarantee Scheme sum ruahman a ni a, sorkar laipui chuan June 24, 2020 khan 'Distressed Assets Fund-Sub-Ordinate Debt for MSMEs' a siam.

    MSME-te hma khua ngaih vangin sorkar contract cheng vbc. 200 chinah global tender khap a ni.

    MSME leh business unit mi 100 aia tlem thawktu neite'n sum harsatna vanga an hna an chawlhsan mai loh nan sorkar laipui chuan EPF support system ṭha tak a siam a, MSME & business unit nuai 3.67 tan cheng vbc. 2,500 ruahmanna siamin, thawktu mi nuai 72.22-te'n EPF support hi an chhawr mek.

    Ram pum inkhàrkhipna kalpui a nih rualin sorkar laipuiin PM Garib Kalyan Yojna/PM Poor Welfare Scheme cheng vbc. 1,70,000 a ruahman nghal. June 28, 2020 thleng khan mi vbc. 80-te hnenah free ration pein, DBT hmangin mi vbc. 36-te account-ah pawisa a thunsak. Heng atan hian sorkar laipuiin cheng vbc. 64,500 a séng.

    Agri Infrastructure - Post Harvest Infrastructure and Schemes for 10000 FPOs dinna atan cheng nuai 1 ruahman a ni. NABARD kaltlanga loneitute puih nan Special Liquidity Facility cheng vbc. 30,000 ruahman a ni a, June 30, 2020 thlengin cheng vbc. 24,586.87 sem chhuah a ni tawh.