President-in MZU Convocation a hmanpui Hmeichhiate'n hma an sâwn - President

President Ram Nath Kovind chuan nimin khan Mizoram University (MZU) Convocation vawi 16-na a hmanpui a; Mizorama hmeichhe lehkhathiam rualte hlawhtlinna aṭangin India ramah hmeichhiate'n nasa takin hma an sawn tih a lan thu a sawi.

MZU Multipurpose Hall-a convo­cation-ah hian MZU visitor Ram Nath Kovind chuan, MZU-a zirlai hlawh­tlingte leh an nu leh pate thinlung taka a lawmpui thu sawiin, "MZU aṭanga degree nei leh a tiṭha filawr thlan chhuah zinga tam zawk hmeichhia an ni hi a lawmawm a, Mizorama hmeichhe lehkhathiam rualte hlawhtlinna aṭang hian India ramah hmeichhiate'n nasa takin hma an sawn tih a lang," a ti.

President chuan, MZU-ah zirtirtu ṭha tak tak an awm avangin nasa zawkin hma a sawn zel dawn tih sawiin, "NEP 2020 thil tum ber research based education te, skill development, entrepreneurship leh vocational education-te a ni a, MZU-in hmalakna thui tak a kalpui tawh. Department of Science & Technolgy nen thawkhoa Incubation Centre pathum MZU-in a din hi hmasawnna nasa tak a ni," a ti a; MZU chu mahni kutkea eizawnna din tumte tan inzirna hmun ṭangkai tak a ni dawn thu leh MZU tihchangtlunna project cheng vbc. 60.31 hu EWS scheme chuan MZU leh Mizorama zirna sangte a chawi san dawn thu a sawi.

National Education Police (NEP) 2020 hnuaiah skill development leh vocational education nasa zawka kalpui a ni dawn tih sawiin President chuan, "Mizoram pawhin a chhawr hle dawn. Mizoramah hian ramhmul - thing leh mauahte hausakna nasa tak a awm a, entrepreneur-te'n mau sawngbawlna lam hawi industry bakah horticulture leh floriculture lam an hawi a fuh dawn a ni," a ti.

Ram Nath Kovind chuan, univer­sity-te chu company-te ang bawkin an awmna state chhunga mipui vantlang tana rawngbawlna kawngah mawhphurhna nei an ni tih sawiin, "Company-te'n corporate social responsibily(CSR) hmangin mipui vantlang tihhmasawn hna an thawk ṭhin a, chutiang chu university-te pawhin university social responsibility (USR) an nei," a ti a; USR hnuaiah thingtlang khuate model village atan thlangin tihhmasawn ṭhin a nih thu a sawi.

President chuan, Mizoram chu a mawi mai bakah, lehkhathiam tamna a nih thu sawiin, "Sik leh sa a nuam a, boruak a thianghlim a, biodiversity-ah a hausa em em a, Mizoram leh hmarchhak biala biodiversity hi humhalh zel ngai a ni," a ti.

President hian MZU-a gold medal dawngtu mi 38 zinga mi 10 hnenah tangkapui leh thuchei a hlan a, Ph.D hmu mi 68 zinga mi 10 thlante hnenah Governor Hari Babu Kambhampati-a'n certificate hlànin, CM Zoramthanga’n Book Prize dawngtu zinga mi pathum hnenah lawmman a hlân.

MZU Convocation-ah hian Assem­bly speaker Lalrinliana Sailo, Lok Sabha MP C Lalrosanga, minis­ter C Lalrinsanga, minister of state Lalruatkima, deputy speaker Lalrin­awma, chief secretary Dr Renu Sharma, DGP DC Srivastava te pawh an tel.

Tun ṭum convocation-ah hian degree, gold medal leh prize dawngtu mi 7,830 an awm a, hripui léng avangin mi 545 chiah a hmuna tel turin sawm an ni.