Kamrul-a tribal nihna hlihsak ; Scheduled tribe certificate pahnih a lo nei

Kamrul Islam Laskar, Ṭhuam­pui, Aizawl-in Kamlova Chhangte s/o Tlangchhuana Chhangte tih hming púa Scheduled tribe certificate a neih chu nimin khan Mizoram sorkarin a titawp.

Thu dawn danin, Kamrul Laskar hian Scheduled tribe (ST) certificate pahnih a nei a; a neih hmasak zawk chu June 27, 2018-a pek chhuah niin, a pe chhuaktu chu JH Lalrimawia, SDC, Aizawl district a ni. A ST certificate hnuhnung zawk chu June 12, 2020-a pek chhuah a ni a, a pe chhuaktu chu V Lalmuanpuii, assistant commi­ssioner, Aizawl district a ni.

Kamrul Laskar-a ST certificate pahnihah hian Kamlova Chhangte s/o Tlangchhuana Chhangte, Ṭhuampui, Aizawl tih ve ve a ni a, Mizo (Lushai) a ni tih tarlan a ni bawk.

Kamrul-a'n ST certificate a neih chungchangah hian Lalhunliana Ralte, Mission Vengthlang chuan hma lain, November 20, 2021 khan ST certificate titawp (cancel) tura ngenna State Scrutiny Committee for Verification of Community Certificates (SSCVCC) Chairman (Home department Joint Secretary ni bawk) hnenah a thlen a, Committee chuan case no. 3 of 2021 an ziak lut a ni.

SSCVCC-in ngun taka a chhui zui hnuah Kamlova Chhangte hnena Aizawl DC Office-in ST certificate a lo pek chhuah tawh pahnihte chu tihtawp a nihna thupek (order) chu nimin khan a tichhuak.

Committee chuan, Kamrul Islam Laskar hnenah dik lo takin ST certificate pek a nih thu a tarlang.

Kamrul Islam Laskar-a'n ST certificate a neih chu titawp turin Central YMA leh Mizo Students' Union-te'n sorkar ngenin, an ngenna lehkha chu Aizawl DC-ah an thehlut a; Lalhunliana Ralte pawhin SSCVCC-ah ngenna a thlen bawk.

ST certificate titawp theitu chu SSCVCC a ni a, an hnena thu thlentu Lalhunliana Ralte chuan Vanglaini palai zawhna chhángin, Mizo hnam danah chuan Mizo-a saphun chu Mizo leh hnam dang inkarah ni loin, Mizo leh Mizo inkarah chauh a theih thu a sawi a, "Kamrul-a hian Mizo-ah sa a phun thei lo hrim hrim," a ti.

Lalhunliana Ralte chuan hma a lak chhan sawiin, "Hetianga non-tribal hnena ST certificate pek hi Mizo hnam kal zelna atan a him lo a, Mizo hnam himna atan a ni. Dan hi kan chungah a awm tih kan hriat a ṭha," a ti a; November 21, 2021-a Madras High Court order-ah chuan, hnam (caste) pakhat aṭangin hnam dangah a inleh theih loh tih a nih thu a sawi bawk.

Vanglaini palai zawhna chhangin Kamrul-a chuan, a ST certificate chu titawp turin sorkarah a ngen niin a sawi a; Lalhunliana Ralte erawh chuan, Kamrul-a'n sorkarah ngenna a thlen loh thu leh, ama'n (Lalhunliana) ngenna a thlen chungchang SSCVCC-in a ngaihtuah lai pawhin ukilte ráwnin ST certificate titawp lo turin ṭan a khawh viau zawk niin a sawi thung.

STATE SCRUTINY COMMITTEE ORDER
1) Kamrul Islam Laskar chu Bagha bazar, Cachar district lam mi a ni a, a pa chu Sonamoni Laskar (L) niin, a nu chu Noor Khatun Laskar a ni.
2) Unau paruk a nei a, tribal a ni lo. A pian tirh aṭanga Muslim a ni.
3) Kamrul Laskar hi kum 1978 aṭangin Mizoram hmun hrang hrangah a khawsa ṭan.
4) Kamrul Laskar hi September 25, 1995-ah Champhai Vengthlang Presbyterian Kohhran vestry-ah baptisma chantir a ni a, a baptisma certificate registration no. chu 4158 dated 25.09.1995 a ni.
5) September 19, 2002 khan Kamrul-a'n Tlangchhuana Chhangte s/o Manthanga, Champhai Veng­thlang hnenah sa a phun tih tih­­chianna affidavit pek a ni a; bap­tisma certificate a neih hnu kum sarih­naah Mizo-ah sa a phun.