AMC-in bawlhhlawh hralh aṭangin Chhiah Rs 1,32,404.7 a hmu tawh
Aizawl khawpui bawlhhlawh sâwngbâwlna, Solid Waste Management Centre (SWMC), Tuiriala recycable waste dealer 18-te'n bawlhhlawh hman nawn theih an lâk khawm quintal 4,038.22 an hralhna aṭangin Aizawl Municipal Corporation (AMC)-in chhiah (revenue) Rs 1,32,404.7 a hmu tawh.
AMC executive councillor Laltlanzova Khiangte (i/c Solid Waste Management) chuan Vanglaini palai zawhna chhangin, AMC-in SIPMIU aṭanga January 20, 2022-a SWMC a lak chhâwn hnuah recycable waste-te lei khawm turin SWMC chhungah dealer 18-te stall siamsak an nih thu a sawi a, "Dealer-te hian phai lamah an hralh leh ṭhin a, AMC chuan chhiah tlema zawng a la a, March thla aṭangin recyclable waste chhuak zat chhinchhiah ṭan a ni," a ti.
Dealer-te'n March thla chhungin recycable waste quintal 1,324.75 an thawn chhuah aṭangin revenue
Rs 43,071 lak a nih thu sawiin Laltlanzova chuan, "April thla chhungin dealer-te'n metal quintal 74.51, paper/cardboard quintal 702.96 leh plastic quintal 579 an thawn chhuak a, chhiah Rs 44,666.85 kan hmu leh," a ti a; May thla chhungin recyclable waste quintal 1,357 thawn chhuah aṭangin chhiah Rs 44,666.85 an hmuh tawh thu a sawi.
Laltlanzova Khiangte chuan, AMC-in SWMC an enkawl hnuah bawlhhlawh ṭawih theite chu leiṭhaah siam tumin theihtawp chhuaha hma an lak thu te, chuta tan chuan AMC leh Waste Tech & Bio-Energy-te an thawh dun thu leh, hun rei lo têah bawlhhlawh ṭawih thei aṭanga leiṭha an siam chu kg. 25 bag-ah dahin zawrh chhuah tum a nih thute a sawi bawk.
AMC chuan recycable waste hralhnaah hian metal quintal khatah Rs 75, paper/ cardboard quintal khatah Rs 35 leh plastic quintal khatah Rs 25 zel chhiah an la a ni.