NSS-in 2021-22 ah thisen unit 3,215 an pe
Aizawl khawpuia zirna-in hrang hranga programme officer leh volunteer-te tan May 4, Nilaini khan Synod Conference Centre-ah faina lama hmalakna, Swacchata chungchang zirhona buatsaih a ni a, Sports & Youth Services secretary Dr Lalrozama'n a hmanpui. Kum 2021-22 chhungin NSS-in thisen unit 3,215 an pek thu tarlan a ni.
State NSS officer Dr Zirlianngura'n report a pek danin, NSS hian sorkar kum liam ta 2021-22 chhungin Mizoramah thisen unit 3,215 an pe a; Covid-19 léng avanga pawl tam tak tan thisen pek a remchan loh chhungin Aizawl leh district khawpui hrang hrangah thisen pek an kalpui reng a ni.
Covid-19 vanga harsatna tawk chhungkua eng emaw zat tan alu, dailuah, chi, chini, artui, chhang leh pawisa eng emaw zat task force kaltangin NSS-in an pe a; Covid-19 vaccine pekna hmun hrang hrangah thawktute puiin NSS volunteer-te an duty ṭhin. Kuminah thing 2,540 vel an phun tawh a, kum hmasa lama thing phun tawh 4,000 vel an enkawl zui a; hmun hrang hrangah vantlang zun-in, waiting shed leh tuikhur eng emaw zat an siam a; ṭum 100 chuang faina hnatlang an huaihawt bawk.
Workshop-ah hian Aizawla higher secondary school hrang hrang aṭangin NSS programme officer leh volunteer 100 vel an tel a; Dr Lalrozama chuan, NSS volunteer-te'n vantlang hmun pawimawh - zirna-in, bazar, kawngpui, lui, damdawi-in leh khelmualte an tifai ṭhin chu fakawm a tih thu a sawi.
St. Xavier’s College-a assistant professor Lalengkima'n thupui a sawi a; NSS volunteer-te'n faina chung changah hlâwk leh ṭha zawka hma an lâk dan tur an zirho nghal a ni.