Mizoramah President a rawn zin

President Ram Nath Kovind chuan Mizorama zan khat riak turin nimin chawhma khan Aizawl a rawn thleng a, vawiinah Mizoram a chhuahsan leh nghal ang.

Ram Nath Kovind hian nimin chawhma dar 10 vel khan Lengpui Airport a thleng a, Home minister Lalchamliana leh sorkar hotu dangte'n an lo hmuak.

Lengpui Airport aṭangin helicopter hmangin Ṭhuampui Helipad a pan a, chhun dar 11:55-ah Ṭhuampui thlengin, Governor Dr Hari Babu Kambhampati, chief minister Zoramthanga, chief secretary Dr Renu Sharma, DGP Davesh Chandra Srivastava leh sorkar hotu dangte'n an lo hmuak a ni.

Ṭhuampui Helipad aṭangin lirthei hmangin Raj Bhavan a pan leh a, Raj Bhavan-ah hian deputy chief minister Tawnluia leh sorkar official dangte'n an lo hmuak leh bawk.

President Ram Nath Kovind hian nimin tlai dar 4 khan Mizoram University Convocation vawi 16-na a hmanpui a, nizan khan Raj Bhavan-ah riakin, vawiin chawhma hian Mizoram a chhuahsan dawn a ni.