January-March chhungin TB leh HIV vei kawp 85 hmu

National TB Elimination Programme (NTEP) chuan nimin khan Directorate of Hospital and Medical Education auditorium-ah first quarter review meeting an nei. Mizoramah kumin January aṭanga March thla inkarah TB leh HIV vei kawp mi 85 hmuh chhuah a nih thu tarlan a ni.

Review meeting hi state TB officer Dr Vanlalfela'n a kaihruai a, district tin aṭangin TB officer-te leh thawktu dangte an tel. Tarlan danin, kumin January-March chhungin Mizoramah ngawr (TB) vei mi 457 hmuh chhuah a ni a, TB leh HIV vei kawp mi 85 hmuh chhuah a ni bawk.

Thla thum chhunga TB vei hmuh tamna ber Aizawl district-ah mi 292 hmuh a ni a, hmuh tlemna ber Mamit district-ah mi pakua hmuh a ni thung.

TB leh HIV vei kawp Aizawl district-ah mi 62 hmuh chhuah a ni a, Champhai district-in mi 10 hmuh niin, Lawngtlai district-ah mi pakhat chiah hmuh a ni. MDR-TB vei mi 28 hmuh chhuah a ni a, chu'ng zinga 24 chu Aizawl district-a mite an ni.

Mizoram pumah TB vei thei dinhmuna dingte'n TB laka invênna damdawi TB Preventive Therapy (TPT) pek theih mi 1,554 an awm laiin, mi 170 (10.94%) chauhin an la a; Kolasib district-ah erawh chuan TPT pek theih mi 98-te'n an la vek thung.

NTEP Review Meeting-ah hian kumin January-March inkara TB vei hmuh chhuah dan te, TB laka invenna leh TB vei enkawlna lama hmalak dante thlirho a ni a; Dr Vanlalfela'n Central TB Division nen ṭang duna Piramal Swasthya Foundation-te'n district hrang hranga TB vei hmuh chhuahna lam kalpui dan a tarlang.

Dr Vanlalfela chuan, TB venna damdawi TB Preventive Therapy la thei zingah la lo an tam thu sawiin, mipui zirtir tam a ngaih thu leh ṭan lak nasat a ngaih thu a sawi.