Tlawng lui dung zawh chhuahna Save Tlawng Lui Project khâr

Minister of state K Lalrinliana chuan nimin khan a bial chhunga Bairabi North YMA Hall-ah 'Save Tlawng Lui Project' khârna inkhawm hun a hmanpui. Minister chuan, tui indaih lohna thleng mek chu ngaih pawimawh a ṭul thu a sawi.

K Lalrinliana chuan, Save Tlawng Lui Project chuan hmasawnna a thlen ngei a beisei thu sawiin, "Mizoram nunna hnár ang hiala ngaih theih kan tui lâkna ber Tlawng lui chhanchhuah a ṭulzia inzirtirna leh mipui náwlpui kaih harhna atana mi inpe tak takte'n 'Save Tlawng Lui Project' an kalpui hi a lawmawm tak zet a ni," a ti.

Minister chuan, "Tui indaih lohna thleng mek hi ngaih pawimawh a, lui dunga thing leh nungcha humhalh leh tui thianghlim nei tura kan bawlhhlawh sawngbawlna kawngahte ngaihtuahna thar put a ṭul," a ti a; hydel project tuikhuah kama lo neih tum ṭâlh an awm ṭhin chuan tuihnà a tihchhiat ṭhin thu a sawi.

Save Tlawng Lui Project hnuaia Tlawng lui zawh chhuaktu Romalsawma, Mission Vengthlang pawhin thu sawiin, Mizoram leilung hausakna chereu mek chhanchhuah nan leh ramngaw neih belh nan pên chhuah a hun tawh thu leh hma la turin mi tin an pawimawh thu a sawi.

Inkhawmah hian Kolasib DFO Margaret Lalramchhani, PHE assistant hydrogeologist Dr F Lalbiakmawia, AMC councillor Ramthanzauvi, Save Tlawng Lui Project Management team secretary R Lallawmsanga, Bairabi Joint YMA leh Bairabi VC aiawhte'n thu an sawi bawk.

Save Tlawng Lui Project hi April 19, 2022 khan kalpui ṭan a ni a, Zotrek, East India Campers leh Mission Vengthlang Adventure Club-te'n a ṭul angin an buaipui. Romalsawma hian Zobawk, Mausen kàia Tlawng hnár aṭangin lui a zawh ṭan a, nimin khan Bairabi a thleng a ni.