Kuminah Kolasib district-ah ASF vanga vawk thi a la awm lo

Kolasib District Committee on African Swine Fever & other Transboundary Animal Diseases chu an chairman John LT Sanga, district bawrhsap hoin nimin khan DC conference hall-ah an ṭhukhawm a, ASF leh ran natna dang, ramri kaltlanga inkai darh theihte vên dan tur an sawiho. Kuminah Kolasib district-ah ASF vanga vawk thi a la awm lo tih tarlan a ni.

John LT Sanga chuan, ASF vanga vawk vulhtute'n Mizoram hmun hrang hranga harsatna nasa tak an tawh mek laiin, Kolasib district-in a tuar nêp tih a sawi a, "District AH&Vety-a thawktute hmalakna vang a ni. Hri léng vèn hautak tak a nih avangin department hrang hrangte nen thawhhona ṭha neih zel a pawimawh," a ti.

Kolasib-ah inkhawmpui lian thlen lai a nih avangin sa mamawhna a san lai a ni tih sawiin Bawrhsap chuan, "Mihring ei atana sa hrisel chauh talh a nih theihna tura AH&Vety department thawktute'n endikna uluk taka an kalpui hi a lawmawm hle a ni," a ti bawk.

District veterinary officer (DVO) Dr Engkunga Chhangte chuan, ASF-in Mizoram a luhchilh hnuah Kolasib district-ah vawk 158 a thi tawh a tih sawiin, "District dang nena khaikhin chuan a tlem ber pawl a ni a, hei vang hian ASF vanga Mizorama vawk sa indaih lohna leh harsatna awm theihte sutkian a nih theih nan Kolasib district a pawimawh hle," a ti.

Dr Engkunga Chhangte chuan, kumin 2022 chhunga ASF vanga thi nia rinhlelh vawk endik pariat chu ASF vei an ni lo tih finfiah a nih thu leh, kumin March-May inkara vawk thi 319-te chu Classical Swine Fever vang a nih theih thu a sawi.

Ṭhutkhawma tarlan danin, kum 2021 khan AH&Vety, FOCUS leh MzSRLM ṭanghoin Classical Swine Fever vaccine 5,322 an pe a, vawkpui 2,405 kah rài aṭangin vawk notê 10,739 an piang.

Classical Swine Fever vaccine hi vawk notê thla thum la tling lo leh vawk rái laiah pek theih a ni lo a, Kolasib district-a vawk thi chhinchhiah tam zawk chu vaccine pek loh a ni.