Zangnadawmna avangin Keifang Venglai VC ṭhiah a ni

National Highway no. 06 zauhnaa zangnadawmna chung-changah Keifang Venglai Village Council chu dik lo taka thil tia ngaih an nih avangin Mizoram sorkar chuan a ṭhiat.

Thu dawn danin, Keifang Venglai VC ṭhiahna thupek hi May 2, 2022 khan Local Admi­nistrative Department (LAD) secretary Zodingpuii'n a tichhuak a; Keifang Venglai VC hi MNF party-in thuneihna an channa a ni.

LAD Secretary-in VC ṭhiahna thupek a tihchhuaha a lan danin, NH-06 zauh leh laih chungchangah hian Keifang Land Owners Asso­ciation chuan Keifang Venglai VC lakah sorkarah complaint an thehlut a; LAD chuan enfiah turin field inspector a tir zui a ni.

Enfiahna report leh ram neitute zualkona chu LAD chuan Ombudsman ngaihtuah turin an thawn a; Ombudsman-in a zir chian hnuah, Keifang Venglai VC laka lungawi lohna (complaint) chu thu dik a ni a, an phû tâwka hrem ngei an phu a, VC chu ṭhiah ni rawh se, tiin thutlukna a siam.

LAD chuan Keifang Venglai VC chu ṭhiah an nih lohna chhan tur sawi tur an neihte sawina hun pein, show cause notice a pe a; Keifang Venglai VC pawhin insawi­fiahna an thlen a ni.

An insawifiahna an zir chian hnuah LAD chuan Keifang Venglai VC chu ding zel tlakah a ngai lo a, The Lushai Hills District (Village Council) Act, 1953 Section 25(1) tlawhchhanin a ṭhiat ta a ni.