KHAWTHLIR

IAS-ah kai
Mizoram Civil Service officer pahnih Sangchhin Chinzah leh Zodingpuii te chu Indian Administrative Service (IAS)-ah kaitir an ni a, AGMUT cadre pek an ni. Hemi chungchangah hian sorkar laipuia Ministry of Personnel, Public Grievances and Persons chuan May 4, 2022 khan hriattir a tichhuak a ni.

Lehkhabu lehlin
Mizo Writers Association (MWA) chuan kum 2021 chhunga ṭawng danga ziah lehkhabu, Mizo ṭawnga lehlin ṭha ber an thlanna kal mekah a ṭha zual pathum an thlang chhuak tawh. Lehkhabu lehlin ṭha zual pathumte chu - R Lalrawna lehlin 'Davida' tih te, JF Laldailova Junior lehlin 'Ringtute hriat makmawh mi ropuite' tih leh, Synod Literature & Publication Board buatsaih 'Zosaphluia Chanchin (DE Jones-a autobiography)' tihte a ni.

Vaimim zirho
Mamit district bawrhsap Lalnunhlua chuan nimin khan Mamit Chhimveng YMA Hall-ah Mamit leh Damdiai khuaa SEDP 2022-23 hnuaia vaimím, bekang leh fu chíng tura thlante tana training buatsaih a hawng. Training-ah hian KVK, Lengpuia mithiamte'n vaimim chìn dan leh natna hrik laka vên dan an zirtir a ni.

Aizawl Sahuanin Rs 1,56,780 hmu
Aizawl Zoological Park (Sahuan) chuan April 2022 chhung khan sahuan entute aṭangin Rs 1,56,780 an hmu chhuak. Aizawl Sahuanin April thlaa Sahuan tlawh man aṭanga sum an hmuh dan chu - luh man aṭangin Rs 1,24,680, lirthei dahna man aṭangin Rs 30,450 leh camera fee aṭangin Rs 1,650 a ni.

Mi 8,49,008-in vaccine la tawh
Mizoramah May 4, Nilaini thleng khan mi 8,49,008-in Covid-19 vaccine an la tawh a, chu'ng mite hnenah chuan vaccine dose 15,76,532 pek a ni tawh. Vaccine dose khatna la tawh mi 8,49,008 zinga 6,86,421-in dose hnihna an la tawh a, precautionary dose la tawh mi 41,103 an awm. Nilaini bikah chuan vaccine dose 1,191 pek a ni a, dose khatna 669, dose hnihna 151 leh precautionary dose 371 a ni.