Covid-19 active case san lamah Mizoram pathumna

India rama state leh union territory 36 zingah nimin tlai dar 5 dinhmun angin Mizoram chu Covid-19 hri vei hmuh chhuah tawh aṭanga enkawl mek (active case) percentage san lamah pathumna (0.13%) a ni a, hripui vei dam tawh chhuahtir tawh (discharge) percentage-ah pahnihna (99.56%) a ni.

Nimin tlai dar 5 thlenga sorkar laipuiin India ram Covid-19 dinhmun a tarlanah, active case percentage hi Delhi-ah sang berin 0.31% a ni a, pahnihna Haryana-ah 0.27% a ni. Hri vei enkawl lai awm tawh lohna state pali a awm bawk.

Active case percentage 0.10% aia sang awmna state/UT pali - Delhi, Haryana, Mizoram leh Uttarakhand chiah a awm tawh a, state/UT 32-ah chuan active case hi 0.10% hnuai lam vek a ni tawh.

Hripui vei hmuh tawh aṭanga enkawlna aṭanga chhuahtir tawh (discharge) percentage sanna ber leh thihpui tawh zat percentage hniamna ber chu Dadra and Nagar Haveli and Daman and Diu a ni a; hengah hian Mizoramin a dawt ve ve a ni.